DILI, 27 Maiu 2025 (TATOLI)–Autoridade Seguransa kompostu husi Servisu Migrasaun (SM) no Batallaun Orden Públiku (BOP), tersa kalan maizumenus tuku 20:20 Otl, kaptura sidadaun Filipina, Arnolfo Teves JR, iha nia rezidénsia, Metiaut, Dili.
Tuir informasaun ne’ebé TATOLI asesu husi pesoál informadór sekretu katak motivu autoridade seguransa bá foti obrigatoriamente Arnolfo tanba ezekuta desizaun Tribunál nian ne’ebé indefere ona pedidu azilu polítiku ne’ebé antes ne’e nia hato’o ba Tribunál basaa nia sente persegidu polítiku iha nia rai orijen.
Tuir Tribunál katak pedidu azilu polítiku ne’e só atribui ba ema iha nia nasaun orijen ne’ebé sente persegidu hanesan situasaun polítika ladi’ak no defende direitu umanu. Enkuantu, sidadaun Arnolfo molok ne’e akuzadu ba krime asasinatu iha nia rai orijen, Filipina. Ho razaun ne’e mak sidadaun ne’e la prenxe kritériu ba azilu polítiku.
Oras ne’e, sidadaun referida asegurada ona iha edifísiu Servisu Migrasaun Vila Verde no tuir planu sei deporta hikas bá nia rai orijen, iha kuarta (28/05) tuku 03.00 ne’e.
Notísia relevante: Supremu Tribunál Justisa deside la halo estradisaun ba Arnolfo Teves
Ba asuntu ne’e, Defeza husi Arnolfo Teves Jr, Advogadu Privadu José Ximenes, hateten nia la konkorda ho maneira atuasaun autoridade seguransa ba nia kliente.
“Kapturasaun no atuasaun ne’ebé autoridade seguransa halo ba ha’u-nia kliente ne’e lahó umanizmu no hahalok ida-ne’e ilegál,” José Ximenes hateten ba Tatoli via watsApp, tersa kalan.
Nia dehan, nia sei la ko’alia barak, maibé aban (28/05) sei ko’alia ho mídia kona-ba kestaun ne’e.
Jornalista: Natalino Costa
Editór: Xisto Freitas da Piedade
