DILI, 29 Maiu 2025 (TATOLI)- Governu aprova ona projetu dekretu-lei, ne’ebé aprezenta husi Ministru Ensinu Superiór, Siénsia no Kultura, José Honório Jerónimo, atu kria subvensaun públika ida ba estabelesimentu ensinu superiór, públiku no privadu sira, ne’ebé funsiona iha territóriu.
“Diploma ida-ne’e ho objetivu prinsipál sira atu promove kualidade ensinu superiór no hametin instituisaun sira-nia sustentabilidade finanseira”, refere nota husi Governu.
Dokumentu ne’e esplika mós katak liuhusi subsídiu ida-ne’e, hakarak atu enkoraja hadi’a nafatin kondisaun pedagójika, infraestrutura no teknolójika instituisaun ensinu superiór sira-nian.
Hodi hatutan katak atribuisaun subvensaun ida-ne’e depende ba kumprimentu kritériu rigorozu sira kona-ba kualidade no dezempeñu institusionál nian, ne’ebé define ona husi Ministériu Ensinu Superiór, Siénsia no Kultura.
Jornalista: Arminda Fonseca
Editora: Maria Auxiliadora
