BAUKAU, 30 Maiu 2025 (TATOLI)—Governu liuhosi Ministériu Agrikultura, Pekuária, Peska no Floresta (MAPPF), sesta ne’e, hala’o diálogu ho komunidade benefisiáriu relasiona planu konstrusaun projetu irrigasaun Modobuti, Aldeia Uatu-ua, Suku Gariuai, Postu Baukau Vila.
Diretór Jerál Agrikultura Kafé no Planta Indústria, Martinho Laurentino Soares, esplika projetu referidu kategoria orsamentu boot husi MAPPF tanba hakarak distribui bee ba natar husi Aldeia Uatu-ua to’o Suku Seisal.
“Dialogu ne’e atu sosializa ba komunidade liuliu agrikultór ne’ebé nia rai iha-ne’e atu kontribui ba implementasaun projetu irrigasaun,” Diretór Jerál Agrikultura Kafé no Planta Indústria hateten iha Suku Samalari, Postu Baukau Vila.
Martinho salienta, tinan barak ona komunidade agrikultór iha área referida sempre hasoru dezafiu tanba mota-boot sobu irrigasaun nune’e afeta natar ektare barak abandonadu.
Aleinde ne’e, nia haktuir, kada tinan MAPPF tenke normaliza kanál irrigasaun ne’ebé konstrui iha tempu Indonézia ne’ebé estragadu ona kauza husi mota-boot hodi afeta ba komunidade nia natar.
“Ita hein katak kompañia kumpri kontratu tuir durasaun tempu,” Martinho Lourentino Soares espera.
Nia husu komunidade benefisiáriu sira atu kontribui no projetu irrigasaun Governu sei la halo indemnizasaun ba rai no ai-horis tanba razaun bazeia ba ezijénsia agrikultór inklui sei hasa’e rendimentu no aumenta produsaun.
Xefe Suku Samalari, Rui Magno Siqueira, hato’o sentimentu kontente tanba Governu konsege rona no rezolve ona komunidade nia halerik kona-ba problema irrigasaun tanba durante tinan barak natar abandonadu tanba kestaun irrigasaun.
“Projetu ne’e sei fó serbisu ba komunidade no rezultadu povu mak sei sai benefisiáriu ba implementasaun projetu irrigasaun ida-ne’e,” Rui Sequira hateten.
Projetu konstrusaun Irrigasaun Modobuti tuir planu sei lansa fatuk dahuluk iha fulan Juñu-Jullu ho durasaun kontratu tinan-tolu ne’ebé sei responsabiliza husi kompañia internasionál China NucIear Industry-22 Construction CO.LTD ho totál orsamentu hamutuk millaun $22.
Projetu ne’e sei halo modelu portaun (bokadura) rua kompostu kanál husi leste ho distánsia kilómetru 14 no kanál oeste ho distánsia kilómetru 18 ne’ebé sei benefisia komunidade suku ualu kompostu Gariuai, Uailili, Samalari, Builai, Buibau, Kaibada Makasae, Buruma no Seisal ho totál natar ektare 1.200 resin.
Jornalista: Natalino Belo
Editór: Xisto Freitas da Piedade
