DILI, 30 Maiu 2025 (TATOLI)-Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, informa hahú semana oin STAE distribui hikas kartaun biométriku bá territóriu hafoin pendente durante fulan-rua.
“Kartaun biométriku eleitorál ho nia ribbon sira hahú tama horiseik no inklui ohin sira kompleta, proxima semana ita halo distribuisaun kartaun ne’ebé maka pendente durante fulan rua”, dehan nia ba TATOLI iha nia knaar fatin Kaikoli, sesta ne’e.
Mesmu pendente durante fulan-rua, maibé nia dehan atendimentu kontinua la’o hanesan atualizasaun. “Ita la simu sira-nia kartaun eleitorál banhira sira mai renova, ita entrega fali kartaun tuan ne’e ba sira hodi hein kartaun mai”.
Diretór Jerál dehan, prosesa aprovizionamentu ba kartaun biométriku daudaun ne’e la’o hela, ne’ebé kuandu termina, hahú atribui.
“Kartaun ne’e iha rihun 200 no ribbon iha 500, kada ribbon ida bele imprime kartaun purvolta 400-resin, normalmente 500 mais dala barak iha situasaun balun, tanba faila entaun ita prevee de’it rihun 400, maibé 500 ne’e bele responde ba rihun ne’e hotu kedas”, nia dehan.
Nia hatutan, depende ba volume eleitór sira ne’ebé mai renova sira-nia kartaun. “Se ita haree to’o fulan-Agostu, Setembru no fulan-Outubru mak númeru eleitór aumenta ita haree katak sei la bele atende, entaun presiza aumenta. Más tinan ida-ne’e ita haree sufisiente”, katak nia.
Diretora Nasionál Teknolojia no Informasaun iha STAE, Tulia de Andrade, informa totál eleitór ne’ebé pendente durante fulan-rua ne’e hamutuk 47.510
Hosi númeru ne’e kompostu Munisípiu Aileu iha 3387, Ainaru iha 3053, Baukau iha 5084, Bobonaru iha 3550, Kovalima iha 2717, Dili iha 13439, Ermera iha 1551, Lautein iha 3051, Likisá iha 3308, Manatutu iha 2453, Manufahi iha 1876, Oekusi iha 1286, Vikeke iha 2392, Ataúru iha 363.
Eleitór ne’ebé resensia iha sistema ne’e hamutuk 925.247. Hosi númeru ne’e, 137.333 maka atualiza ona, seidauk atualiza iha sistema hamutuk 787.914 no eleitór foun ne’ebé rejistu ne’e iha 14.454. Atualiza ona ba kartaun biométriku ne’e hamutuk 151.787, mane iha 77.999 no feto iha 73.781.
STAE iha osan $1.966.746, ba programa bens servisu nian, saláriu vensimentu, kapitál menór. Hosi ne’e STAE ezekuta ona 17%, ekivale ba osan $349.288,51. Ba akizasaun ba kartaun biométriku no barak iha saláriu vensimentu.
Notisia relevan: https://tatoli.tl/2025/04/14/stae-sei-produs-tan-blanku-rihun-200/
Notísia relevante: STAE sei prodús tan blanku rihun-200
Jornalista : Osória Marques
Editora : Rita Almeida
