DILI, 14 Abríl 2025 (TATOLI)-Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, dehan tinan ne’e STAE aloka verba hamutuk $240.780 hodi prodús blanku rihun-200.
“Marsu ne’e kuaze munisípiu hotu-hotu blanku estoke hotu. Ita propoin halo akizasaun blanku ba tinan ida-ne’e hamutuk 200.000, ho nia ribbon (toner) 500 ho nia transfere filme ne’e iha 132. Komponente tolu ne’e tenke la’o hamutuk. Ida-ne’e mak ita tau osan hamutuk $240.780”, nia dehan ba TATOLI iha nia knaar fatin Kaikoli, segunda ne’e.
Nia informa ba eleitór ne’ebé trata hela kartaun biométriku sira katak blanku kuaze hotu iha munisípiu sira, maibé sei funsiona iha fulan-Juñu nia rohan tanba agora STAE halo hotu ona prosesu, ne’ebé blanku sei to’o iha Maiu nia rohan.
Diretora Naisonál Teknolojia no Informasaun iha STAE, Tulia de Andrade, hatutan hosi lansamentu to’o Marsu liubá ne’ebé atualizadu ba biométriku ne’e hamutuk 136.546.
“Ida-ne’e mak atualiza ba kartaun eleitorál biométriku hamutuk 136.546, kompostu foun ka eleitór ne’ebé rejistu direita ona ba kartaun biométriku iha 11.975 no atualiza hosi kartaun eleitorál anteriór ne’e iha 124.571”, nia informa.
Kona-ba blanku ne’e iha munisípiu balun sei iha no balun hotu, hanesan iha Ataúru nian blanku sei barak no kontinua prodús nafatin, tanba eleitór kiik.
“Akizasaun faze daruak ne’e ita presiza rihun 200, no prosesu ne’e iha hela aprovizonamentu. Ida-ne’e ami-nia tarjetu ne’e sei to’o iha Maiu nia rohan ou inisíu Juñu ne’e”, nia katak.
Totál eleitór ne’ebé asesu ona ba biométriku ne’e hamutuk 132.162. Munisípiu Aileu iha 9.620, Ainaru iha 8.187, Ataúru 2.080, Baukau iha rihun 12-resin, Bobonaru iha 9.282, Kovalima iha 7.271, Dili iha rihun 35-resin, Ermera iha 7.966, Lautein 7.232, Likisá iha 7.944, Manatutu iha 9.236, Manufahi iha 5.871, Oekusi iha 4.403 no Vikeke iha 6.070.
Governu alokadu $1.966.746 ba STAE
STAE tinan ne’e iha osan $1.966.746, ida-ne’e ba programa bens servisu nian, saláriu vensimentu, kapitál menór. Hosi ne’e STAE ezekuta ona 17%, ekivale ba osan $349.288,51. Ba akizasaun ba kartaun biométriku no barak iha saláriu vensimentu.
Notísia relevante: STAE prodús ona biométriku 111.442 iha territóriu
Jornalista : Osória Marques
Editora : Rita Almeida
