DILI, 07 Marsu 2025 (TATOLI)-Sekretariadu Tékniku Administrasaun Eleitorál (STAE), prodús ona biométriku hamutuk 111.442 ba Timoroan iha territóriu.
“Munisípiu hotu la’o ona desde 6 Janeiru liubá”, Diretora Nasionál Teknolojia no informasaun iha STAE dehan ba TATOLI via WhatsApp, sesta ne’e.
Tulia de Andrade informa, eleitór ne’ebé eziste daudaun ne’e 924.959, kompostu husi mane 480.552 no feto 444.407.
Atualizasaun sira hamutuk 56.062 (6,06%), kompostu husi mane 28.384 no feto 27.678, ba prominente hamutuk 868.897 (93,94%), kompostu husi mane 452.168 no feto 729.
Aleinde ne’e iha mós eleitór ne’ebé rejistu foun hamutuk 4.830, kompostu husi mane 2.236 no feto 2.594, nune’e totál eleitór hamutuk 60.892 iha territóriu.
STAE iha loron 07 Dezembru 2023 aloka osan $600.000 hodi implementa rejistu eleitorál uza kartaun biométriku.
Kartaun biométriku ida rejista dadus ho eletróniku husi titulár, normalmente karakterístika oin hanesan imprime liman-fuan, konfigurasaun oin no matan. Marka sira-ne’e bele lee ho dispozitivu neʼebé analiza no sertifika ema nia identidade, nia esplika.
Nia haktuir, ida-ne’e maka prosesu komputadór ida-neʼebé seguru liu duke observasaun vizuál de’it husi nia portadór, tanba bele fasilita kria no atualiza baze dadus fásil liu.
Notísia relevante: STAE Dili emite ona kartaun biométriku 3.000-resin
Jornalista : Osória Marques
Editora : Rita Almeida
