DILI, 02 Juñu 2025 (TATOLI)—Ekipa husi Ministériu Administrasaun Estatál (MAE) hamutuk ho instituisaun sira, Segunda ne’e, halo atividade limpeza jerál iha área besik mota Komoro.
Ministru Administrasaun Estatál, Tomas do Rosário Cabral, hateten, atividade ne’e hodi proteje oseanu no ambiente.
“Ohin loron ita kontinua halo limpeza iha área mota laran Komoro atu evita foer tuun ba tasi. Ita halo kampaña loron-ualu ba oseanu azúl hodi proteje ambiente hanesan ita haree iha mota Komoro ne’e lixu barak hanesan plástiku no karreta a’at, entaun ita labele hein de’it autoridade lokál maka organiza, maibé ita hotu tenke halo kampaña ba zero plástiku ne’e tanba ita illa ki’ik ida maibé ita-nia oseau tenke di’ak,” Ministru hato’o iha Komoro.
Ekipa MAE mai ho líder komunitária sira hodi rekolla hotu lixu, ne’ebé atividade hanesan sei kontinua to’o Tibar.
Governante ne’e dehan, bainhira hetan ema ruma soe karreta a’at iha espasu públiku sei aplika multa $500 to’o $1.000.
“Tanba fatin públiku la’ós tau sasán a’at iha ne’e, depois Estadu mak raut hela de’it. Enkuantu iha dadeer ne’e kuaze kamioneta rekolla foer tonelada 10-resin ona mak lori ba lixeiru Tibar. Entaun foer sira-ne’e bele liu tonelada 200 tanba lixu plástiku, kalen, besi a’at no foer uma-laran nian barak tebes iha mota laran, ita sei esforsu halo limpeza husi mota Komoro to’o tasi-ibun atu foer sira-ne’e labele tama bá tasi-laran,” nia tenik.
Notísia relevante : SEKoop selebra loron mundiál kooperativa ho atividade limpeza jerál
Iha fatin hanesan, Xefe suku Bebonuk, Alfredo da Costa, haktuir, horiseik Primeiru-Ministru no ekipa husi MAE mai haree lixu sira iha mota-laran no iha lixeiru fatin kuaze la raut durante loron-haat ona.
“Ita alerta beibeik ba komunidade maibé laiha konsiénsia atu evita soe lixu arbiru. Lahatene komunidade nia konsiénsia mak laiha no soe lixu fali bá mota laran. Ho ida-ne’e mak ohin hetan orientasaun husi líder Governu sira, entaun ohin loron ita tenke hamoos hotu lixu sira-ne’ebe mak iha ne’e,” líder komunitáriu hato’o.
Nune’e ohin Autoridade lokál ho ninia Konsellu suku hamutuk ho MAE halo limpeza iha mota-laran to’o tasi-ibun.
“Kona-ba kareta aat ne’e ita ko’alia ona ho nia na’in atu lori ba rai iha nia fatin,” Xefe suku, tenik.
Abitante Bebonuk, Martinho da Silva Neto, sente haksolok tanba entidade sira Governu bele halo limpeza.
“Maibé ami mós triste tanba foer sira-ne’e soe arbiru iha fatin públiku, entaun atu proteje ambiente ne’ebé moos ema hotu tenke kontribui labele so’e foer arbiru,” nia fó hanoin.
Nia dehan foer ne’e nia volume sempre aumenta kada loron, tanba ne’e presiza ema hotu nia kontribuisaun hodi bele minimiza volume foer iha kapitál.
Atividade ne’e hetan tulun mós husi Institutu Jestaun Ekipamentu no Apoiu ba Dezenvolvimentu Infraestrutura (IGEADI) ne’ebé fasilita eskavatór rua hodi halo limpeza no sobu rai nehek ne’ebé intupidu iha baleta.
Jornalista : Alexandra da Costa
Editora : Julia Chatarina
