KOVALIMA, 11 Juñu 2025 (TATOLI) – Ministériu Edukasaun liuhusi Diretór Nasionál Infraestrutura Edukativa, Helio Lopez, fó orientasaun ba dirijente Eskola Bázika Sentrál (EBC) Beilaku atu harii lutu hale’u Eskola Bázika Filiál (EBF) Harekain, iha Suku Raimea, Postu Zumalai Munisípiu Kovalima.
“Eskola bele organiza fasilidade ne’ebé bele hetan tulun hodi servisu hamutuk ho inan-aman. Eskola balun ita finaliza konstrusaun, inan-aman no autoridade komunitária apoiu halo lutu uza ai-horis hodi fó mahon”, Helio Lopez hato’o molok inaugura EBF Harekain, iha Zumalai, ohin.
Dirijente edukasaun ne’e enkoraja estabelesimentu ensinu sira atu bele iha inisiativa hodi harii lutu protesaun ho ai-horis sira. Katak, halo konservasaun ba meiu-ambiente di’ak hodi halo protesaun, fó mahon ba alunu bainhira iha oras deskansa.
Eskola EBF Harekain lokaliza besik estrada-ninin tanba ne’e nia orienta koordenadór EBF atu organiza harii lutu hale’u eskola ho razaun eskola balun inan-aman ho autoridade voluntária kuda ai-horis iha eskola.
Iha sorin seluk, Diretór EBC Beilaku Hilario Magno, promete sei organiza inan-aman sira atu harii lutu hale’u eskola EBF Harekain.
“Infraestrutura di’ak ona maibé ita presiza konstrui tan morru protesaun hodi hale’u eskola tanba eskola EBF Harekain besik iha estrada-ninin”, nia dehan.
Ho orientasaun husi Ministériu Edukasaun, hanesan dirijente eskola sei mobiliza inan-aman atu harii lutu hale’u eskola – provizóriu uza horis .
Entretantu, totál alunu iha EBF Hareekain hamutuk 100-resin. Totál manorin ne’ebé hanorin iha EBF Harekain hamutuk na’in-neen.
Notísia relevante:ME – Embaixadór Japaun inaugura edifísiu EBF Harekain iha Zumalai
Jornalista:Celestina Teles
Editór: Rafael Ximenes de A. Belo
