DILI, 13 Juñu 2025 (TATOLI)—Federasaun Futeból Timor-Leste (FFTL) hamutuk ho empreza ETO Group, Sesta ne’e, atribui prémiu apresiasaun estraordináriu ho montante $100.000 ba ekipa jogadór selesaun nasionál no tékniku ofisiál sira hafoin manán 1-0 kontra Maldivas iha jogu kualifikasaun Tasa Ásia AFC 2027 iha estádiu NRL Darwin, Austrália, iha loron 10 Juñu 2025.
Diretór Selesaun Nasionál, João Maneco Soares Amaral, hateten, husi FFTL oferese osan $6.000 no husi empreza Eto Group $94.000.
“Maibé bainhira jogadór sira atu hetan osan oinsá ne’e tuir orientasaun husi Prezidente FFTL, Nilton Gusmão nomós nu’udar na’in ba ETO Group, tanba nia orienta katak bonus ne’e sei atribui ho montante ne’ebé hanesan ba sé de’it mak envolve-an iha ekipa ne’e,” Diretór informa ba jornlista sira iha salaun Konferénsia FFTL, Formosa.
Nia dehan, premiu ne’e la’ós diatribui de’it ba jogadór maibé sei oferese mós ba ekipa treinadór no ofisiál sira inklui mós tékniku operasionál sira-ne’ebé apoiu durante jogu iha Darwin, Austrália.
Notísia relevante : Futebolista João Pedro sai “Man of The Match” iha jogu kontra Maldivas
Entaun totál ekipa ne’ebé hetan prémiu ne’e hamutuk na’in-38, ne’ebé kada ema hetan $26.000-resin
“Bonus ne’e oferese ba sira tanba bainhira antes realiza jogu ne’e, Prezidente FFTL deklara ba jogadór sira katak karik imi joga manán ha’u sei oferese bonus hamutuk,” nia akresenta.
Aleinde ne’e, parte Federasaun mós sempre promete ba jogadór sira bainhira joga manán normalmente sira sei hetan sira-nia direitu hanesan atribui sentidu apresiasaun prémiu (bonus) ho montante $6.000.
“Bonus sira ne’e ho prinsípiu atu motiva liután jogadór sira atu performe di’ak liu iha kampu. Hodi hetan mós apresiasaun boot husi entidade sira-ne’ebé hadomi futeból,” nia katak.
Serimónia entrega simbólika ne’e partisipa husi reprezentante husi ETO Group, Reprezentante FFTL, Treinadór selesaun nasionál, inklui jogadór no pesoál tékniku sira.
Jornalista : Alexandra da Costa
Editora : Julia Chatarina
