KOVALIMA, 17 Juñu 2025 (TATOLI) – Organizasaun Naun-Governamentál (ONG) Hali ba Dame (HABADA), Tersa-ne’e, fahe informasaun seguransa komunitária ba joven-sira iha Suku Suai Loro, Postu administrativu Suai, Munisípiu Kovalima.
Diretór Ezekutivu ONG HABADA, Abel Amaral dehan, ONG HABADA realiza atividade envolvimentu joven no komunidade harii dame hodi fahe informasaun ba joven sira iha suku Suai Loro ne’e hetan suporta husi Embaixadór Austrália iha Timor-Leste.
“Ami realiza atividade envolvimentu joven no komunidade harii dame hodi hala’o diálogu komunitária ho intensaun atu promove pás iha komunidade nia leet oinsá atu redús krime, oinsá komunidade halo komunikasaun di’ak ho nia estrutura konsellu suku bainhira iha indikasaun konflitu bele hato’o ba malu bele hapara violénsia ne’ebé atu mosu”, Abel Amaral, dehan ba jornalista iha sede suku Suai Loro, ohin.
Diretór ONG HABADA mós husu ba joven sira nafatin matan moris bainhira ema deskoñesidu ka aktu ne’ebé atu destroi seguransa iha suku no aldeia joven-sira bele iha inisiativa komunika ho joven sira seluk atu hapara.
Ho atividade ONG ne’e hanesan parte atu fó hanoin fali ba joven sira katak hamosu violénsia ho dalan saida de’it la fó benefÍsiu tanba ne’e presiza promove diálogu hodi rona malu, bainhira iha naksalak ruma presiza atu husu malu nune’e labele monu ba violénsia.
Meiu atu promove pás mak fasilita formasaun seguransa komunitáriu iha suku hodi partilla máteria oinsá mak joven-sira sai na’in ba solusaun nune’e joven-sira labele monu ba violénsia tanba ne’e mak presiza atu partilla informasaun kona-ba atu halo prevensaun ba konflitu, dame mai husi uma-laran, aldeia no suku nune’e dezenvolvimentu bele la’o iha suku no aldeia sira.
Notísia relevante:HABADA motiva komunidade Holsa “seguransa ema hotu nia responsabilidade”
Reprezentante embaixadór Austrália Iha Timor Leste, José Marçal, reforsa katak Governu Austrália iha Timor-Leste komprometidu atu fó apoiu programa lubuk ida hodi apoia ba Governu Timor-Leste.
“Programa ohin loro ita mai iha ne’e, ami mós apoiu programa barak husi Governu Austrália hanesan programa haruka traballadór ba Austrália, bolsa estudu, programa apoiu desentralizasaun, PNDS no programa iha setór edukasaun hodi kria parseiru ne’ebé mak ho amizade ho Governu Timor-Leste”, nia dehan.
Presiza kria pás no estabilidade
Ho nune’e nia mós fó hanoin ba joven-sira iha Suai Loro katak, joven-sira presiza atu kria pás no estabilidade – Iha Timor-Leste ne’e importante, tanba munisípiu Kovalima, munisípiu ne’ebe viziñu ho Indonézia hodi fó benefísiu di’ak.
Ho prezensa joven ne’ebé tuir formasaun bele kontinua hatutan informasaun ba joven sira seluk ne’ebé mak la iha tempu atu partisipa iha atividade formasaun kona-ba seguransa komunitáriu ba joven sira.
Reprezentante Administradór Postu Administativu Suai, Luzinho do Rego hato’o agradese ba ONG HABADA ne’ebé hodi bele hili suku Suai Loro hodi hala’o atividade fahe informasaun seguransa komunitáriu ba joven sira.
“Ha’u hanoin atu halo prevensaun iha ita-nia komunidade importante ho nune’e Governu ita-nia programa Ministériu Interiór iha Dirasaun ida destaka pontu vokál hodi hala’o mediasaun no ONG mós apoiu ita oinsá mak bele habelar programa prevensaun konflitu atu harii dame”, nia fó hanoin.
Razaun atu harii dame presiza investe tanba Timor-Leste ukun rasik aan tinan 20-resin ona molok ne’e avó sira moris iha situasaun ne’ebé ho violénsia ne’ebé Portugal ukun ho sikoti ho violénsia mai to’o iha okupasaun Indonézia mós ukun nafatin ho violénsia nune’e mentalidade ho violénsia ho konflitu.
Ho nune’e Governu iha hanoin katak presiza investe área ne’ebé atu prevene konflitu presiza kria pás iha rai-laran liliu ba joven-sira iha suku no aldeia presiza kria dame, bainhira la iha estabilidade no mosu konflitu sei afeita ba dezenvolvimentu tanba joven-sira presiza iha konsiénsia oinsá atu kria dame.
Jornalista:Celestina Teles
Editór: Rafael Ximenes de A. Belo
