VIKEKE, 24 Juñu 2025 (TATOLI)—Xefe suku Ahik, postu administrativu Lakluta, munisípiu Vikeke, Ercilio Soares, informa projetu Programa Nasionál Dezenvolvimentu Suku (PNDS) ba tinan 2025 ne’e seidauk bele implementa tanba kondisaun estrada aat.
“Programa PNDS ba tinan 2025 ne’ebé foin lalais iha nivél munisípiu Vikeke lansa ona iha loron 12 fulan-Juñu ne’e. Maibé, iha ami-nia suku Ahik ne’e seidauk bele implementa tanba sei haree klíma udan no kondisaun estrada liga ba ami-nia suku kondisaun grave, tanba ne’e mak seidauk implementa ne’e,” Xefe suku Ahik hateten ba Agência Tatoli, iha postu Lakluta, ohin.
Xefe suku ne’e haktuir, obra PNDS ba tinan 2025 suku Ahik reabilita estrada kilómetru rua (2) ba komunidade suku Ahik asesu, maibé dadauk ne’e kondisaun kílima seidauk tanba ne’e seidauk loke kuotasaun ba empreza sira hodi partisipa ba fornesementu materiál fabrikanu nian.
“Difikuldade ne’ebé ami hasoru mak kondisaun estrada mak ladi’ak. Tan ne’e, mak ami seidauk loke konkursu públiku ba fornesementu nian. Se ita loke tiha konkursu no manán-na’in iha tiha mós sira bele tula materiál ba fatin konstrusaun. Nune’e, ami dada uitoan tempu ba fulan-Jullu udan para mak ami loke konkursu ba fornesementu besi, simente inklui fornese rai-henek,” nia dehan..
Nia hateten, obra PNDS ba reabilitasaun estrada ne’e hahú husi aldeia Ai-Lo’ok to’o aldeia Kai-Wa iha suku Ahik ho totál purvolta kilémetru rua (2) hodi reabilita estrada surtu ne’ebé gasta orsamentu hamutuk $25,945.13.
“Kona-ba implementasaun obra, ami laiha problema. Ami-nia probelema mak kondisaun estrada. Ami nafatin esforsu hodi implementa obra PNDS ba tinan 2025, maibé tama fulan-Jullu mak sei udan, ami labele implementa tanba dalan karreta lori materiál ba fatin konstrusaun ne’e aat,” nia dehan.
Nia realsa, obra PNDS iha kalendáriu tenke finaliza iha loron 31 Dezembru 2025, maibé kondisaun udan no estrada bele impaktu ba projetu PNDS ne’ebé implementa iha suku Ahik.
Bázeia ba sensu uma kain 2015, suku Ahik ho totál populasaun 1.247 ne’ebé hela iha aldeia lima mak hanesan aldeia Krarek Boku, Hali-Oan, Ai-Lo‘ok, Hali-Mean no aldeia KaiWa.
Iha fatik ketak, Ministru Administrasaun Estatál (MAE), Tomás do Rosário Cabaral, apela ba suku sira aselera obra PNDS ba tinan 2025 tenke finaliza iha loron 31 Dezembru 2025.
“Ha’u haree munisípiu Vikeke foin mak halo lansamentu projetu PNDS 2025 nain. Maibé, obra PNDS 2025 ne’e antes loron 31 Dezembru 2025 tenke konklui obra PNDS. Obra sira-ne’e ninia relatóriu tenke hatama iha fulan-Outubru,” nia dehan.
Jornalista : Vitorino Lopes da Costa
Editór : Cancio Ximenes
