OEKUSI, 25 Juñu (TATOLI) – Servisu Edukasaun Rejiaun Administrativa Espesiál Oekusi Ambeno (RAEOA), aloka rihun $410,496.66 husi Orsamentu Jerál Estadu (OJE) 2025 nian atu implementa progama merenda eskolár ho loron efetivu 53.
Diretór Edukasaun Oekusi, Vincencio Cono, informa alvu ba implementasaun programa merenda eskolár ne’e ba Ensinu Pré-Eskolár (EPE) hamutuk 16, Ensinu Bázika Filiál (EBF)12 no Ensinu Bázika Sentrál (EBC, sigla portugés) hitu (7).
Notísia relevante:Ekipa Saúde observa merenda eskolár iha EBF 30 Agostu Masin falta ijiene
“Programa ne’e alvu ba estudante 18.441 ba loron efetivu 53 ho totál orsamentu ne’ebé mak sai iha segundu períodu ne’e $410,496.66, kada estudante sei han $0,42 sentavus iha loron ida,” Vincencio Cono, ba jornalista sira hafoin oferese fundu merenda eskolár ne’e ba dirijente eskola sira, iha salaun edukasaun Oekusi, ohin.
“Maibé, ohin iha orientasaun husi Sekretária Rejionál ba Asuntu Edukasaun no Sosiál. Ita orienta ba Diretór EBC sira atu implementa ba de’it loron efetivu 14, entaun sira sei gasta de’it $108,433.08,” nia afirma.
Entretantu, kona-ba Ensinu Pré-Eskolár (EPE) sira, antes hahú ona iha loron 02 Juñu foin lalais ne’e ho totál estudante hamutuk 833 kabe ba loron efetivu 53, nune’e sei gasta orsamentu hamutuk $18,542.58.
“Maneira implementasaun, ne’e kabe ba kompeténsia gabinete direitiva ensinu báziku, sira mak deside koziñeiru mak bele implementa, maibé sira iha konkordánsia no nomeia husi kada eskola mak envia mai iha Departementu Apoia Asaun Sosiál Eskolár atu hetan karta koñeismentu husi edukasaun nu’udar implementadór,” nia hateten.
Hafoin atribui fundu hirak-ne’e, nia fó hanoin ba dirijente eskola sira, atu ezekuta orsamentu ne’e ba de’it programa merenda eskolár, implementa tuir menu ne’ebé ministériu Edukasaun define ona atu kumpre padraun saúde nian.
“Husu dirijente eskola sira, tanba levantamentu orsamentu ne’e ba loron efetivu 53, husu atu asegura orsamentu ne’e ba programa no direitu estudante ninian, husu mós dirijente eskola sira, tantu eskola privada no públiku, hahú husi EPE to’o EBC, atu implementa ho loloos, no tuir menu ne’ebé kada grupu kuziñeiru aprezenta bazea padraun saúde nian, nune’e presiza servisu hamutuk atu aselera relatóriu nune’e bele aselera mós ba levantamentu terseiru periódu,” nia apela.
Iha biban ne’e, Diretór EBC Um de Maiu Palaban, Fredio Mario da Silva, promete sei ezekuta orsamentu ne’e ho responsabilidade no kumpre kritéria no menu sira-ne’ebé Ministériu Edukasaun fó sai ona.
“Ami agradese ba Governu, maske tarde maibé la’o nafatin, ne’ebé komesa loron 30 Juñu semana oin ami hahú implementa ona, hanesan ohin ami husi EBC Palaban simu $86.279, ne’ebé osan ba eskola, hahú husi alunu no mestre sira, ami sei ezekuta ho responsabilidade, sei hato’o relatóriu, no implementa tuir planu no menu ne’ebé ministériu fó sai ona, tanba ami-nia ekipa kuziñeiru sira prepara ona, segunda atu hahú implementa,” nia promete.
Notísia relevante:MAE apela ba responsavel programa atu kontrola ikan iha merenda eskolár
Jornalista: Abílio Elo Nini
Editór: Florencio Miranda Ximenes
