DILI, 28 Juñu 2025 (TATOLI) – Governu Timor-Leste liuhusi Ministériu Turizmu no Ambiente realiza espozisaun artezenatu no festivál kulinária lokál hodi anima Konferénsia Komunidade Portugés-Aziátiku (APCC) ba dahaat ne’ebé hala’o iha Sentru Konvensaun Dili (CCD) iha loron 27-29 Juñu 2025.
Diretora Nasionál Imprendimentu Atividade Produtu Turístiku, nu’udar Komisaun Organizadora, Maria Ernestina Lopes, esplika atividade ne’e nu’udar inisiativa direta husi Primeiru-Ministru, Xanana Gusmão, ho objetivu atu selebra Konferénsia Internasionál APCC ne’ebé hala’o iha Timor-Leste nu’udar uma-na’in.
Notisia relevante:Grupu husi Flores promove patrimóniu kulturál portugés iha konferénsia APCC
“Atividade ne’ebé ita prepara mak espozisaun artezenatu, jardin de kafé, kulinária gastronómia ho objetivu katak ita mós país hamutuk ho nasaun sira Luzu-Aziátiku sira hanesan intérkambiu kulturál ita promove ita-nia produtu hanesan promosaun ida,” Maria Lopes dehan iha CCD, sábadu ne’e.
Totál tendane’ebé prepara iha espozisaun konferénsia internasionál ne’e hamutuk 25 kompostu stan jardin de kafé, artejenatu no feira, ne’ebé envolve komunidade lokál timoroan nomós reprezentante sira husi nasaun membru komunidade luzu-aziátiku sira hanesan Indonézia no Malázia faan hotu sira-nia produtu.
Tuir nian, espozisaun ne’e la’ós de’it fatin atu promove kultura, maibé mós loke oportunidade ekonómika ba komunidade.
Iha fatin hanesan, Partisipante espozisaun husi Grupu Buka Rasik husi munisípiu Lautein, Fernanda dos Santos, agradese ba Governu tanba bele envolve sira iha feira ne’e hodi faan sira-nia produtu.
“Ami kontente tebes bele partisipa. Horiseik ha’u hetan $150 husi fa’an tais feto mane inklui pasta ki’ik sira, no seluk tan,” nia dehan.
Aleinde produtu kulinária no artezenatu, pintura juventude Timor-Leste nian mós iha fatin espesiál ne’e hanesan promosaun ida hodi promove sira-nia pintura. Pintura oioin husi artista joven sira hatudu nu’udar parte ida husi kompetisaun no promosaun artevizuál nasionál sira ba nivel internasionál.
Festivál gastronómiku ida tuir planu sei hala’o iha loron datoluk konferénsia nian, hanesan kulminasaun husi selebrasaun promosaun produtu lokál sira ba bainaka internasionál sira.
Notisia relevante:Kalbuadi Lay: APCC sai ponte kulturál-diplomátiku ba CPLP no ASEAN
Jornalista: Arminda Fonseca
Editór: Florencio Miranda Ximenes
