KOVALIMA, 01 Jullu 2025 (TATOLI) – Prezidente Autoridade Munisípiu Kovalima, Miguel Armada Cardoso, hamutuk ho Sekretáriu Asuntu Sosiál liuhusi Servisu Munisipál Protesaun Sívil no Jestaun Desastre Naturál fó apoiu nesesidade bázika ba Uma Mahon iha aldeia Faularan, suku Maudemo, Postu administrativu Tilomar, Munisípiu Kovalima.
Nesesidade sira ne’e mak hanesan foos marka Vitória saka 10, supermie kaixa 25, biskuit kaixa ida, masin kaixa ida, pasta-dente ka pasta nehan (Pepsodent) pakote lima lima, manta 20, eskova nehan pakote lima, toalla 20, sabaun Nuvo kaixa ida no rinso kaixa ida.
“Autoridade munisípiu Kovalima nia hanoin rasik mak fó apoiu nesesidade bázika ba Uma Mahon Salele tanba ita haree ba situasaun tinan barak mak ita-nia oan sira iha Uma Mahon Salele, Autoridade Kovalima, Miguel Armada Cardoso informa ba jornalista hafoin entrega nesesidade bázika iha Uma Mahon Salele Tilomar, ohin.
Notísia relevante:Uma Mahon Salele fó mahan ba vítima violénsia sira
Líder munisípiu ne’e dehan, autoridade oferese apoiu nesesidade bázika ne’e bazeia ba autoridade nia kapasidade ne’ebé mak iha tanba Uma Mahon Salele mak halibur oan sira ho nune’e autoridade iha hanoin hodi fó apoiu nesesidade bázika hodi ajuda maske labarak maibé fó apoiu tuir kbiit autoridade Kovalima.
Apoia ne’e la’os rotina maibé depende forsa tanba la prevee orsamentu. Bainhira iha forsa, bainhira simu pedidu, buka meiu apoiu ba vítima sira ne’ebé hela iha Uma Mahon Salele.
Notísia relevante:PR Horta apoia mákina suku roupa inklui nesesidade seluk ba Uma Mahon Salele
Jornalista:Celestina Teles
Editór: Rafael Ximenes de A. Belo
