DILI, 01 Jullu 2025 (TATOLI)-Sekretaria Estadu Igualdade (SEI) fasilita formasaun durante loron tolu, hahu ohin (01/7) to’o kuarta, (03/7) semana-ne’e ba Asosiasaun Feto Munisípiu (AFM) atu hakbiit feto nia partisipasaun iha prosesu desentralizasaun podér lokál.
Sekretária Estadu Igualdade, Elvina Sousa de Carvalho, konsidera formasaun ne’e importante tanba asina akordu konaba implementasaun servisu iha baze hodi prepara feto sira-nia koñesimentu bainhira prosesu dezentralizasaun podér lokál ne’e akontese.
“Asosiasaun Feto Munisípiu ne’e feto ne’ebé empoderadu no iha ona kbiit, maibé ita atu halo akompañamentu para sira hatene iha informasaun klean durante loron tolu”, membru governu ne’e ba jornalista sira iha salaun Maria Gorete SEI, Kaikoli, ohin.
Governante ne’e reforsa, tanba bazeia ba programa Governu nia sei halo desentralizasaun podér lokál ba autoridade munisípiu sira liuhusi eleisaun ba kámara munisipál sira. Entaun, papél AFM importante tebes.
“Ha’u hakarak hato’o apresiasaun klean ba Asosiasaun Feto Munisípiu sira ho ita-boot sira-nia lideransa sai parseiru prinsipál ba SEI iha prosesu hakbiit no empodera feto iha setór hotu-hotu, fó asisténsia ba ema vulneravél”, nia apresia.
Iha biban ne’e mós Diretór Nasionál Igualdade Jéneru, José do Rosário de Carvalho, afirma SEI kompromete servisu hamutuk ho parseiru hotu tantu nasionál no munisipál.
SEI iha polítika servisu hamutuk ho liña ministeriál sira hanesan Ministéria Administrasaun Estatal (MAE), Parlamentu Nasionál no Sekretariadu Tékniku Administrasaun Eleitorál (STAE) hodi fasilita formasaun ba partisipante sira durante loron tolu.
Notísia relevante: Presiza hametin partisipasaun feto iha ekonómia formál
Jornalista : Alexandra da Costa
Editora : Rita Almeida
