DILI 04 Jullu 2025 (TATOLI) – Ministériu Agrikultura, Pekuária, Peska no Floresta (MAPPF) koopera ho Governu Xina atu harii barrajen bee multifunsaun iha postu administrativu Laklo, munisípiu Manatutu, hodi fó benefísiu ba komunidade, liuliu agrikultór sira.
Xefe Departamentu Teknolojia Irrigasaun husi MAPPF, Agustinho Menezes, dehan ekipa téknika husi Xina mai dahuluk ona iha Timor-Leste iha 2023 hodi halo peskiza iha mota Laklo, ne’ebé konsidera potensiál boot atu halo barrajen multifunsaun.
“Ekipa [Xina] foin mai tan atu [kontinua] peskiza ho ami iha fatin sira ne’ebé ami identifika iha área Laklo nian, tuir planu atu harii barrajen ne’e”, Agustinho Menezes dehan ba Tatoli, ohin.
Agustinho esplika katak barrajen ne’e sei uza ba funsaun oioin, ezemplu ba irigasaun no fornese bee hemu ba komunidade.
Nia dehan bainhira halo levantamentu dadus hodi harii barrajen multifunsaun ne’e bele benefisia komunidade Laklo, no mós komunidade viziña sira iha Laklubar, Natarbora, no parte munisípiu Aileu, postu administrativu Remesiu, no Dili parte Metinaru.
Agustinho dehan reprezentante husi Governu Xina halo ona peskiza ba fatin no agora MAPPF no Governu Xina halo hela diskusaun ba implementasaun nian. Tuir planu, sei realiza iha tempu badak.
Jornalista: Arminda Fonseca
Editora: Maria Auxiliadora
