DILI, 08 Jullu 2025 (TATOLI) –Operadora telekomunikasaun ida iha Timor-Leste, Telemor, patroniza Komisaun Nasionál Olimpika Timor-Leste (CONTL, sigla portugés), iha ámbitu selebra loron internasionál olímpiku, ne’ebé akontese iha loron 05 Jullu ne’e.
Loron Internasionál Olímpiku importante tebes ba komunidade sira hotu liu-liu foinsa’e sira tanba eventu ne’e rasik, tuir komunikadu ida ba TATOLI, hamosu espíritu Olímpiku kria espiritu amizade, no espiritu desportiva ba ema hotu.
CONTL kada tinan sempre realiza eventu ida ne’e ho objetivu atu alkansa no fanun komunidade hotu liu-liu foinsae sira atu nakloke aan ba área desportu ne’ebé mós iha poténsia bele lori Timor-Leste nia naran ba mundu liuhusi dalan desportiva.
Operadór Telemor kompromete natafin fó apoiu ba eventu ida-ne’e, hanesan parte ida husi Telemor nia kompromisu atu ajuda komunidade Timor-Leste. “Apoiu ne’e ajuda atu kria ambiente inkluzivu no motiva juventude no públiku hotu”, refere komunikadu ne’e.
Iha eventu ne’e, empreza internasionál ne’e sai patrosinador prinsipál ida, no entre seluk, oferese prémiu ba partisipante sira. CONTL mós hato’o sira-nia gratidaun ba apoiu ne’e, no espera atu kontinua koopera hamutuk iha futuru.
Entretantu, Loron Internasionál Olímpiku, selebra kada tinan iha loron 23 Juñu, marka data fundasaun Komité Olímpiku Internasionál (IOC) iha tinan-1894. Iha Timor-Leste, loron ne’e fó oportunidade ba komunidade atu promove valór Olímpiku hanesan amizade, eselénsia no respeitu.
TATOLI
