HONIARA, 10 Jullu 2025 (TATOLI)—Delegasaun Timor-Leste ne’ebé lidera husi Ministru Petróleu no Rekursu Minerál, Francisco Monteiro, vizita instalasaun Gold Ridge Mining Limited (GRML) iha Central Guadalcanal, Illa Salomão, iha loron-kinta, 10 Jullu 2025 ne’ebé prodús osan-mean.
Delegasaun ne’e kompostu husi reprezentante sira husi Ministériu Petróleu no Rekursu Minerál (MPRM) Timor-Leste, Autoridade Nasionál Minerál (ANM), Murak Rai Timor (MRT), Institutu Jeosiénsia Timor-Leste (IGTL), Inisiativa Transparénsia Indústria Extrativa (EITI), no Sekretaria g7+.
Delegasaun Timor-Leste ne’e hetan akompañamentu husi Ministru Minerál, Enerjia, no Eletrifikasaun Rurál Illa Salomão, Derrick Rawcliff Manuari. Alende ne’e hetan benvindu husi Diretór GRML, Walton Naezon, Adjuntu Jerente Ezekutivu Mina nian Xiangwen Song, no husi ekipa GRML nian iha serimónia kulturál tuir tradisaun Illa Salomão.
Iha nia diskursu, Ministru Francisco Monteiro hato’o nia respeitu no agradesimentu ba ekipa GRML no subliña katak vizita ne’e halo parte iha misaun g7+ nian, organizasaun intergovernamentál ida ne’ebé halibur nasaun pós-konflitu no frajil sira.
Notisia relevante : Timor-Leste dudu kooperasaun área Minerál ho Illa Salomão liuhosi g7+
“Ami sente onradu tebes ho benvindu ne’ebé hato’o hosi povu rai ida ne’e. Obrigadu tanba permite ami mai iha-ne’e no simu aprezentasaun ida-ne’e hosi GRML. Lori delegasaun Timor-Leste nia naran, ami hato’o ami nia apresiasaun sinseru ba ita-boot sira-nia ospitalidade no apoiu”, dehan Ministru Francisco Monteiro, kinta-ne’e iha GRML iha Central Guadalcanal, Illa Salomão.
Nune’e Sekretáriu Jerál g7+, Helder da Costa, espresa apresiasaun ba benvindu no fatin Gold Ridge hanesan ezemplu ida ba transformasaun ekonómika pós-konflitu.
“Saida maka ita asiste iha-ne’e hanesan símbolu ida esperansa nian no progresu nian, la’ós de’it ba Illa Salomão sira maibé mós ba Estadu-membru sira g7+ nian. Hahú tinan oinmai, Illa Salomão sira sei prezide g7+ durante tinan rua, no ida-ne’e hanesan marku signifikativu ida ba rejiaun”, Helder esplika.
Iha parte seluk, Ministru Derrick Rawcliff Manuari mós espresa nia orgullu ba vizita ne’e, ne’ebé nia dehan hanesan oportunidade ida atu hametin kooperasaun iha setór mineiru.
“Gold Ridge hanesan jogadór xave ida iha setór mineiru Illa Salomão nian. Ami hein atu harii relasaun serbisu ida ne’ebé besik ne’ebé sei fó benefísiu sira no tempu naruk ba komunidade”, nia hatete.
Fatin produsaun osan mean jere hosi GRML, maka mina osan-mean dahuluk no boot liu iha Illa Salomão. Operasaun ne’e lidera husi Wanguo International Mining Group (70%), AXF Resources (20%), no komunidade lokál liuhosi Goldridge Communities Investment Ltd (10%).
GRML rasik lokaliza maizumenus kilómetru 22 hosi kapitál, Honiara. Aleinde atividade osan mean, GRML mós apoia inisiativa dezenvolvimentu komunitáriu, inklui hadi’a asesu eletrisidade no koneksaun internet iha área rurál sira.
Jornalista : Cidalia Fátima
Editora : Armandina Moniz
