DILI, 16 Jullu 2025 (TATOLI) – Durante resesu Parlamentu Nasionál (PN) liuhusi Komisaun Permanente sei hala’o reuniaun plenária semana tolu dala-ida iha loron kuarta.
Aliende la taka dalan ba iha nesesidade posibilidade ba plenária extaordináriu bele konvoka, inklui serbisu komisaun espesializada permanente.
Komisaun ne’e iha membru deputadu efetivu na’in-13, kompostu CNRT neen, FRETILIN haat, PD ida, KHUNTO no PLP ida.
“Husu deputadu komisaun permanente atu kontinua serbisu garante funsionamentu órgaun soberania daruak ne’e durante resesu,’’ Prezidente PN interinu no atuál Segundu Vise PN, Alexandrino Afonso Nunes, hato’o.
Liuhusi reuniaun dahuluk Komisaun Permanente ohin deputadu sira aprova ona projetu deliberasaun Komisaun Permanente númeru 1/VI(2a) ho votu a favór sia, kontra rua no abstensaun rua.
Deputadu FRETILIN, Joaquim dos Santos ‘Boraluli’ la aseita semana tolu halo plenária dala-ida, loloos semana ida dala ida hanesan uluk mós implementa ona, tanba parlamentu tenke funsiona.
Deputadu CNRT, Patrocínio dos Reis Fernandes, fundamenta tempu ne’ebé iha ideál ona, tanba iha resesu kuaze deputadu komisaun espesializa halo estudu komparativu iha rai-li’ur.
Entretantu, plenária ohin liuhusi eleisaun sekretu deputadu sira hili mós deputada CNRT, Cedelízia Faria Santos, nu’udar sekretária meza no Maria Gorumali Barreto, vise sekretária meza Komisaun Permanente, ho votu a favór 13, kontra no abstensaun laiha.
Entertantu, PN iha 15 Jullu hahu tama resesu no sei tama fali iha 15 Setembru 2025.
Notísia relevante:https://tatoli.tl/2025/07/10/resesu-parlamentar-komisaun-permanente-garante-funsionamentu-orgaun/
Jornalista: Nelson de Sousa
Editór: Evaristo Soares Martins
