DILI, 16 Jullu 2025 (TATOLI)—Husi dook, nia baku nia matan hodi heteke hetan jornalista be hakat bá ninia diresaun. Nia la loko aan. Nia hatudu nia oin-midar no hamnasa mihis hasoru jornalista ne’e.
Hanesan lia la kona, nia kontinua hikas nia ezersísiu jogging (haksoit tali) hafoin kontatu matan ba matan. Nia la deskonfia jornalista nia alvu ba sé lerek. Maibé, afinál, nia sai jornalista nia alvu prinsipál.
Bondi…. Jornalista hasee nia. Bondi mós….Hahú mosu interasaun entre parte rua. Hafoin jornalista aprezenta ninia identidade, nia kna’ar no objetivu, diretamente kedas husu ninia disponibilidade atu sai fonte entrevista. Nia laiha dúvida. Aseita entrevistada. Entrevista hahú daudaun.
Asuntu, la seluk la leet. Ninia envolvimentu iha jogu CPLP sai asuntu prinsipál ba jornalista nia ajenda. La’ós segredu ona, nia atleta ida. Nia naran Siera Nisa Xavier Pinto. Nia atleta husi modalidade Taekwondo.
Siera la’ós atleta babain. Nia atleta prestada. Nia rekolla ona medalla tolu kompostu osan mean rua iha eventu Prezidente Cup 2024, osan metan rekollida bainhira partisipa iha eventu kompetisaun iha Kupang, Indonézia, tinan 2024. Prestasaun ida-ne’e, halo nia hakat dook liután. Nia selesionada liuhusi kualifikasaun entre atleta sira sai nu’udár atleta nasionál iha eventu CPLP 2025.
Nia bele orgullu ona. Nia sente orgullu tanba reprezenta Timor-Leste hodi partisipa iha eventu internasionál entre Komunidade Nasaun Lian Portugés (CPLP-sigla portugeza).
“Ha’u sente kontente bele iha oportunidade liuhosi kualifikasaun hodi partisipa iha jogu CPLP,” Siera Pinto informa ba TATOLI iha Otél Ramelau, Aimutin, Kuarta ne’e.
Mehi hakarak sai atleta nasionál sai tebes duni. Maibé, atu konkista, la fásil. Liuhusi prosesu naruk no rigorozu. Tanba ne’e, ba nia, treinu no treinu mak xave ba susesu.
Abnega ba nasaun konta mós nia. Maski Jogu CPLP hela loron ida-rua, maibé nia ho nia kolega sira kontinua treinu ho intensivu. Objetivu ida de’it. Atu foti Timor-Leste nia dignidade iha eventu internasionál.
“Atu foti nasaun nia dignidade, ha’u la ta’uk tohar. Tohar normál iha desportu. Ha’u desididu ona ba ida-ne’e. Husu kolega no família sira reza mai ha’u. Viva Timor-Leste!,” tenik Siera ne’ebé moris iha 30 Janeiru 2009 no hahú envolve treinu Taekwondo ho idade tinan-sia iha Dojan Eagle Global Transformation iha tinan 2018 ne’e.
Jornalista: Natalino Belo
Editór: Xisto Freitas da Piedade
