DILI, 19 Jullu 2025 (TATOLI)—Primeiru-Ministru Interinu no atuál Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, apela ba atleta no arbitrajen sira hotu tenke kompete ho laran moos no unidu durante jogu desportiva CPLP ba da-XII iha Timor-Leste.
Notísia Relevante: Assanami konsidera jogu desportivu CPLP la’ós kompetisaun maibé kompromisu amizade
Primeiru-Ministru Interinu, Mariano Assanami Sabino, hateten, durante jogu atleta no arbitrajen tenke hala’o tuir ida-idak ninia kna’ar maibé tenke lealdade, respeita malu no lahalo diferensa ba malu.
“Ha’u hakarak fahe mós dedikasaun ida katak, rikusoin nasaun nian la’ós de’it natureza maibé atleta sira mós hola parte hanesan ami-nia rikusoin no kultura ba povu Timor,” Vise Primeiru-Ministru ne’e hateten liuhusi diskursu ba abertura jogu desportiva CPLP ba da-XII ne’ebé realiza iha Estádiu Munisipál Dili, ohin.
Tanba, nia dehan, atleta no abitrajen sira mak sai hanesan embaixadór ba jogu, tenke iha prinsípiu valór ne’ebé di’ak durante jogu, entaun presiza atu respeita malu, jogu ho lealdade, mantein unidu ida-idak nia nasaun.
“Tamba jogu ne’e atu hametin amizade la’ós kompetisaun ida,” nia esplika.
Nune’e mos nia fiar katak, jogu desportivu CPLP ne’e bele harii amizade ne’ebé mak di’ak ba jerasaun sira iha futuru oin mai.
Jornalista : Alexandra da Costa
Editór : Cancio Ximenes
