DÍLI, 21 Jullu 2025 (TATOLI) – Kompetisaun Xadrez iha Jogu Desportivu CPLP XII ofisialmente hahu ona ohin iha Sentru Konvensaun Díli (CCD), ho kategoria xadrez padraun (klásiku) feto marka abertura ba eventu desportivu ne’e.
Ronda dahuluk husi jogu sira hahú iha tuku 15:00 Oras Timor-Leste, ho nasaun tolu hanesan Portugal, Angola, no Cabo Verde marka pontu iha ba jogu abertura Xadrez iha Sentru Konvensaun Dili (CCD),
Cabo Verde, reprezenta husi Akiane Patricia Brito Moreno, ho Klasifikasaun Padraun 1509, halakon Lizete de Sousa Timor-Leste iha tuku 16:15 Oras Timor-Leste. Tuir kedas ho Angola reprezenta husi Daniela de F. Santana da Cruz halakon Mosambike ne’ebe representa husi Ayrine Calumia Ismael. Daniela de F. Santana da Cruz halakon Mosambike ho Klasifikasaun Padraun 1542.
Jornada dahuluk konklui ho vitória ba Portugál, reprezenta hosi Sofia Moreira Lopes Rosas Valente, ho Klasifikasaun Padraun tinan 1959, hasoru Xadrista São Tomé e Prínsipe, Emelissa Mallone do Ó de Moura. Jogu ne’e remata iha tuku 5:00 lokraik.
Serimónia abertura kompetisaun xadrez ne’e partisipa mós husi Koordenadór Jogu Desportivu CPLP no atuál Sekretáriu Estadu Arte no Kultura, Jorge Cristovão (SEAK) Timor-Leste, Jorge Soares Cristovão ne’ebé ofisialmente halo abertura ba kompetisaun ne’e. Akompaña husi Francisco Carapinha, Prezidente Federasaun Xadrez Cabo Verde, no Zeferino Viegas Tilman, Prezidente Federasaun Xadrez Timor-Leste.
Kompetisaun xadrez CPLP XII 2025 fahe ba kategoria prinsipál tolu : padraun (klásiku), rápidu, no blitz. Kompetisaun ne’e hala’o iha loron 21 to’o 25 fulan-jullu tinan 2025, ho totál ronde lima hodi determina kampeaun.
Jogu ida-idak sei ofisializa hosi árbitru na’in sia hosi Timor-Leste no árbitru internasionál na’in haat hosi Portugal, São Tomé e Prínsipe, no Cabo Verde.
Ronde daruka marka ona ba loron 22 fulan Jullu tinan 2025, iha ne’ebé jogadór sira sei kompete tan to’o ronde dalima hodi akumula pontu másimu no hetan manan nain.
Kompetisaun CPLP (Comunidade dos Países de Língua Portuguesa) nu’udar eventu desportivu no kulturál bienál ida ne’ebé halibur joven atleta sira hosi nasaun luzófonu sira, ho objetivu atu hametin solidariedade no maun-alin liuhosi kompetisaun ne’ebé saudavel.
Jornalista: Cidalia Fátima
Editora : Armandina Moniz
