DILI, 20 Jullu 2025 (TATOLI)—Prezidente Federasaun Xadres Cabo Verde, Francisco Carapinha, hateten Timor-Leste marka istória iha Xadrez Luzófonu tanba primeiravés ho Timor-Leste nia inisiativa integra modalidade Xadres iha istória jogu desportiva komunidade lian portugués (CPLP) iha kompetisaun multinasionál edisaun ba da-XII.
“Timor-Leste marka istória iha xadrez luzófonu tanba foin primeiravés Xadrez hola parte iha CPLP hanesan sai uma-na’in, ne’e onra boot ne’ebé la’ós ba de’it komunidade Timor-Leste maibé ba mós membru nasaun lian portugés nian,” Prezidente Federasaun Xadres Cabo Verde, Francisco Carapinha, hato’o apresiasaun kle’an ne’e ba jornalista sira iha konferénsia imprensa ne’ebé hala’o iha Sentru Konvensaun Dili (CCD), Kaikoli, ohin.
Nia hateten, esforsu hodi envolve Xadrez iha jogu desportivu CPLP ne’e la’ós fasíl, maibé liuhusi kooperasaun no servisu hamutuk ne’ebé mak sólidu espesialmente iha Konfederasaun Xadres Lúzofonu ne’ebe hari’i iha tinan 2018 iha Bayumi, Georgia, ho partisipasaun Timor-Leste liuhusi Prezidente Federasaun Xadres Timor-Leste (FXTL), Zeferino Viegas Tilman, no mehi ne’e bele sai realidade.
Iha jogu deaportiva CPLP 2025 ne’ebé hala’o iha Dili, modalidade Xadrez sei kompete husi nasaun neen mak hanesan Portugál, Mozambike, Cabo Verde, Angola, São Tome e Principe no Timor-Leste, kada nasaun delega ninia atleta nain-rua (mane ida no feto ida) maibe Timor-Leste mak delega ninia atleta na’in-haat (feto-rua no mane-rua) tanba iha kompromisu hodi promove Xadrez.
Nune’e mós, tuir Prezidente Federasaun Xadrez Timor-Leste (FXTL), Zeferino Viegas Tilman, afirma rekomendasaun atu envolve jogu Xadrez ba iha CPLP ne’e inisiativa husi FXTL rasik.
“FXTL rasik mak rekomenda atu Xadrez bele partisipa mós iha jogu desportivu CPLP ba da-XII iha tinan ida-ne’e atu nune’e ema bele koñese di’ak liután jogu Xadres ne’e mak oinsá,” nia informa.
Jornalista : Alexandra da Costa
Editór : Cancio Ximenes
