DILI, 21 Jullu 2025 (TATOLI)—Prezidente Repúblika, José Ramos Horta, konsidera Timor-Leste sai uma-na’in ba Jogu Komunidade Nasaun Lian Portugés (CPLP-sigla portugés) edisaun ba da-XII ne’e hanesan esperiénsia ida ne’ebé di’ak tebes ba nasaun ne’e.
“Timor-Leste sai uma-na’in ba Jogu CPLP ne’e ho di’ak tebes. Ha’u fó parabéns ba Governu ne’ebé organiza eventu ne’e. Eventu boot ne’e hetan partisipasaun husi ema husi nasaun oioin, la’ós nasaun CPLP hotu-hotu. Maske lojístika komplikadu atu to’o iha Timor-Leste maibé sai hanesan esperiénsia ida-ne’ebé di’ak tebes ba marketing no promove Timor-Leste,” Prezidente Horta hateten ba jornalista sira iha Aeroportu Internasionál Prezidente Nicolau Lobato Dili, foin lalais.
Prezidente Horta esplika, Jogu CPLP iha Timor-Leste fó ba Timor-Leste esperiénsia barak, inklui vizita Amu-Papa Francisco mai Timor-Leste iha tinan kotuk, nune’e mós atividade kulturál, desportu no sientífika sira seluk.
“Iha tinan 2026, Prezidénsia Repúblika, iha parseria ho Governu, sei hala’o simeira boot ida Prémiu Nobel nian iha Timor-Leste. Nasaun liu 10 konfirma ona atu marka prezensa, no 29 seluk sei partisipa mós,” nia hateten.
Tuir Xefe Estadu, prezensa nasaun hirak ne’e nian iha simeira ne’e sei fó esperiénsia ne’ebé iha folin, liuliu iha mundu akadémiku, ba estudante sira, ne’ebé sei iha oportunidade atu tuur hamutuk hodi diskute ho Laureadu Prémiu Nobel iha área siénsia nian.
Nia hatutan, Timor-Leste mós sei hetan esperiénsia husi atividade barak ne’ebé sei dezafia ninia kapasidade bainhira sai membru plenu ba Asosiasaun Nasaun Sudeste Aziátiku (ASEAN).
Jornalista : Hortencio Sanchez
Editór : Cancio Ximenes
