Timor-Leste derrota iha basketeból bainhira kontra Angola

DILI, 22 Jullu 2025 (TATOLI)-Abertura jogu desportivu husi Komunidade Nasaun sira ne’ebé ko’alia lian-portgés (CPLP, sigla portugés) ba modalidade basketeból ekipa jogadór Timor-Leste mane tenke lakon ho ekipa Angola ho pontu 21-3.

Jogadór Timor-Leste mane lori hela bola bainhira kontra adversáriu Angola iha abertura jogu desportivu CPLP ho modalidade basketeból ne’ebé hala’o iha Jináziu Dili, segunda 22 Jullu 2025. Imajen Antonio Daciparu

“Jogu tuir mai, ami sei esforsu para bele hetan pontu ida”, Kapitaun ekipa husi Timor-Leste, José Fernandes dos Santos, ba Tatoli iha Jináziu, tersa-ne’e.

Nia dehan maske lakon maibé sente orgullu, tanba bele partisipa iha atividade amizade ne’e.

Ekipa jogadór mane Timor-Leste kompostu husi Manuel Martins ho númeru kamizola-9, José Fernandes númeru kamizola-13, Julio Soares númeru kamizola-27 no Joanico Soares númeru kamizola-29.

Enkuantu Angola ho nia jogadór Gilson númeru kamizola-2, Zizemar ho númeru kamizola-4 no Nelson ho númeru kamizola-6. Jogu ne’e ema nain-tolu hasoru nain-tolu (Three on three) prezide husi arbiru Beuna Reno no Samuel.

Durante jogu, ekipa uma-na’in hatudu dezempeñu di’ak tebes, maibé tenke lakon ho postura fizika ho Angola.

Jogu ne’e atrai tebes adeptu sira, tanba Angola ho postura ne’ebé aas soe bola rede la falla husi minutu 0 tres segundu to’o minutu lima Angola akomula ona pontu 15 enkuantu Timor -Leste hela ho pontu zero.

Jogadór husi Angola lori hela bola hodi gaña nia adversáriu iha jogu desportivu CPLP husi modalidade basketeból Timor-Leste kontra Angola iha abertura ne’ebé hala’o iha Jináziu Dili, segunda 22 Jullu 2025. Imajen Antonio Daciparu

Hafoin intervalu minutu balun kontinua ba jogu iha oportunidade ne’e jogadór Timor-Leste foin hatama jogadór Joanico soe ho distansia dook uitoan, nune’e konsege rekolla pontu rua no jogadór José soe bola ho distánsia besik liu no tama ba rede laran, nune’e rekolla pontu ida, husi ne’e konsege rekolla de’it pontu tolu.

Jogu ne’e, Angola agresivu husi minutu 5 to’o minutu 10, jogu termina Angola rekolla pontu 21.

Ho vitória ne’e, kapitaun ekipa Angola kontente tanba bele manán uma-na’in. Maibé, nia dehan importante liu mak husi jogu-ne’e bele koñese malu, koñese kultura entre Angola ho Timor-Leste.

Jogadór husi Angola hatama bola ba rede ekipa Timor-Leste hodi aumenta sira nia pontu ba vitória iha modalidade basketeból Timor-Leste kontra Angola iha abertura ne’ebé hala’o iha Jináziu Dili, segunda 22 Jullu 2025. Imajen Antonio Daciparu

“Jogu ne’e bele halo amigu liután, jogu ohin di’ak tebes no ami la sente iha adversáriu maibé husi jogu ita bele koñese malu di’ak liután”, nia konklui.

Entratantu iha jogu feto entre Angola ho Portugal. Portugal manán ho pontu 14 no Angola 10. Jogu terseiru ekipa mane Kabuverde kontra Portugal. Kabuverde manán ho pontu 21, Portugal hela ho pontu 17.

Jogu ikus entre ekipa feto Kabuverde ho Angola. Kabuverde manán ho pontu 13, enkuantu Angola termina ho pontu 10.

Notísia relevante: Jogu CPLP: Kabuverde halakon Timor-Leste ho 4-0 iha modalidade futeból

Jornalista : Natalino Costa

Editora : Rita Almeida