DILI, 24 Jullu 2025 (TATOLI) – Finál torneiu jogu voleiból praia femeninu entre Timor-Leste (TL) no Portugál iha ámbitu Jogu Desportivu CPLP marka jogu ida ne’ebé ho intensidade no emosaun.
Parte rua esforsa atu konkista medalla ba idaidak nia país, maibé vitória iha kompetisaun ne’e monu ba liu Portugál, tanba manán Timor-Leste ho set rua tuituir malu.
Iha kompetisaun ne’e diferente ho jogu sira antes tanba ohin ne’e finál voleiból praia nian. Ema barak mak asiste.
Lian hakilar no apoiu husi adeptu rona iha kampu Lesidere. Fó enerjia ba atleta sira maski hamriik iha rai-manas nia laran hodi luta ba hetan medalla.
Iha jogu primeira parte, dupla portugeza no timorense konsege duni malu to’o hetan pontu hanesan iha 16-16, maibé Portugál komesa aumenta nia pontu banhira atleta timoroan halo falla barak iha simu no service bola, maka set ne’e hotu ho vitória 21-18 ba Portugál.
Iha set tuirmai, Timor-Leste inisia ho vantajen no marka pontu dahuluk. Maibé, ho falla sira ne’ebé halo permite Portugál hakat liu pontu Timor-Leste nian.
Iha set daruak ne’e tanba defeza husi ekipa Portugál di’ak liu maka garante vitória finál ho pontu 21-13. Iha ne’e, Timor-Leste hela iha klasifikasaun daruak hodi hetan medalla osan-mutin ba nasaun.
Iha jogu entre ekipa feto husi Timor-Leste no Portugál ne’e asiste direta mós husi Primeiru-Ministru, Kay Rala Xanana Gusmão.
Iha entrevista ho Tatoli, atleta portugés Inês Silva kontente tebes ho rezultadu jogu tanba susesu ne’e la’ós ema ida nian maibé ekipa tomak. “Ami agradese tanba bele lori medalla osan-mean ba ami-nia rai, ida-ne’e orgullu boot ba ami no ami-nia nasaun”, dehan.
Iha fatin hanesan Treinadór Ekipa Voleiból Praia Portugál, Nuno São Tiago, hateten rezultadu ne’ebé ohin hatudu ne’e tanba treinadór orienta no hanorin jogadór sira atu manán iha jogu.
Nia hato’o respeitu boot ba Timor-Leste, tanba Portugál nia prezensa iha nasaun hodi partisipa jodu ida-ne’e furak tebes. Tuir nia, iha inísiu jogu to’o ramata kompetisaun sempre hetan rezultadu di’ak.
Nia observa katak ekipa rua ne’e hanoin atu hakat ba set datoluk nian tanba mesak forte hotu. Maibé Portugál konsege manán iha set rua de’it, “ida-ne’e orgullu boot ba Portugál”.
“Rezultadu ohin ha’u labele hakerek ho liafuan, tanba iha inísiu jogu Timor-Leste hatudu sira-nia forsa. Ha’u hanoin ami atu lakon, maibé rezultadu ikus ami manán. Ida-ne’e reprezenta ami-nia nasaun. Ha’u orgullu tebes. Orgullu ho saida mak sira halo ona iha loron ida-ne’e”, nia espresa.
Jornalista: Arminda Fonseca
Editora: Maria Auxiliadora
