DILI, 24 Jullu 2025 (TATOLI)-Joaquim José Gusmão dos Reis Martins, uluk bainhira hasoru obrigadu tenke liuhusi protokolu. Maibé, ohin-loron laiha ona.
Eis-Ministru Agrikultura i Peska (MAP) no Sekretáriu Estadu ba Protesaun Sivil (SEPS) ne’e agora halo atividade privada iha li’ur hafoin mandatu termina hanesan membru Governu.
“Hanesan ita-boot haree, ha’u agora nein envolve-an iha servisu ruma iha instituisaun Estadu. Agora ne’e urus de’it ha’u-nia atividade privadu iha setór privadu no hanesan Prezidente Federasaun Basketeból Timor-Leste”, Joaquim hateten ba Tatoli iha Jináziu Dili, kuarta-ne’e.
Nia dehan, hafoin mandatu hotu iha Governu da-ualu, nia hetan kontaktu husi kolega sira iha federasaun atu ajuda dezenvolve modalidade basketeból.
“Momentu ne’ebá, ha’u simu pedidu ne’e no ha’u mai hamutuk ho sira, dezenvolve modalidade iha área basketeból ninian no ohin ita haree, ita organiza modalidade basketeból iha eventu jogu CPLP ba dala-XII ne’ebé halo ita-nia rai, ita mak sai hanesan uma-na’in ba eventu-ne’e”, afirma nia.
Eis-governante ne’e hateten jogu-ne’e amigavel, ba Timor-Leste la’ós manán ka lakon mak kestaun maibé buat importante mak oinsá hametin relasaun ho nasaun amigu ne’ebé ko’alia lian-portugés (CPLP).
Joaquim hateten ho jogu desportivu CPLP nian ne’e mak ba oin Federasaun Basketeból Timor-Leste sei mellora liután modalidade iha Timor-Leste. “Ho jogu ida-ne’e mak ita sei haree hodi hadia di’ak liutan ba oin”, nia konklui.
Notísia relevante: Ekipa basketeból U-16 preparadu hasoru Angola iha jogu abertura
Jornalista : Natalino Costa
Editora : Rita Almeida
