Ekipa basketeból TL avansa ba finál maske derota dala-haat
DILI, 24 Jullu 2025 (TATOLI)-Ekipa mane no feto basketeból U-16 maski lakon dala-haat iha kompetisaun jogu desportivu CPLP 2025, maibé kontinua hetan oportunidade hodi joga iha finál ne’ebé sei hala’o iha sesta, (25/7).
Jogu ne’e ekipa basketeból feto hetan oportunidade kontra ekipa husi Portugál, foin minutu tolu de’it ekipa Portugál rekolla pontu-10 no ekipa feto Timor-Leste nafatin ho zero.
Husi kontinuasaun ne’e, ekipa Portugál ne’ebé kompostu husi Ines Cardoso Leitao, Maliana Indio, Rita Siverino Nune’e, Lara Silva Gomes (suplente) halo jogu dominante, nune’e halo jogadór basketeból feto Timor ne’ebé kompostu husi Tereza Franco Silva, Maria Auxiladora, Rosita Caetano no Moza Malia araska, nune’e ekipa uma-na’in feto rekolla de’it pontu-rua, Portugál ho pontu 21.
Jogu parte daruak ne’ebé akontese iha tuku 17:00-17:30, Timor-Leste hasoru Kabuverde feto no kontinua derota ho pontu-ida, Kabuverde manán ho pontu-21.
Enkuantu ekipa mane Timor-Leste ne’ebé hasoru Portugál ne’e mós hetan rezultadu rua, Portugál ho pontu 21.
Maske uma-na’in derota dala-haat, maibé ekipa mane no feto kontinua hetan oportunidade hodi joga iha final, ne’ebé sei hala’o iha sesta, (25/7) iha Jináziu hodi kontra ekipa husi Portugál hodi hadau terseiru no kuartu lugár iha feto tanba estatutu nu’udar uma-na’in ba jogu desportivu CPLP tinan-ne’e.
Enkuantu ekipa basketeból feto Mosambike ne’ebé manán dramátiku, ekipa basketeból feto Portugál sei hasoru ekipa basketeból feto Kabuverde hodi hadau primeiru no segundu lugár.
Entretantu ekipa mane Angola sei hasoru Portugál hodi hadau primeiru lugár no segundu lugár no Timor-Leste sei hasoru Kabuverde hodi hadau terseira lugár no kuartu lugár.
Rekorda fali katak iha jogu abertura ekipa basketeból mane Timor-Leste lakon ho Angola, Kabuverde no Portugál no ekipa feto iha abertura lakon ho ekipa Angola, Mosambike, Kabuverde, Portugál.
Notísia relevante: Ekipa basketeból Timor-Leste mane no feto kontinua sofre derota
Jornalista : Natalino Costa
Editora : Rita Almeida
