KOVALIMA ,29 Jullu 2025 (TATOLI)- Ministru Petróleu Rekursu Minerál (MPRM), Francisco Monteiro, lori ekipa husi empreza Woodside Energy, bá halo observasaun direta kondisaun infraestrutura preparasaun ba projetu tasi mane, iha munisípiu Kovalima.
Durante prezensa Ministru Petróleu Rekursu Minerál hamutuk ho ekipa empreza Woodside, iha munisípiu Kovalima hodi hala’o atividade sira hanesan vizita Aeroporto Komandante em Xefe Kay Rala Xanana Gusmão, vizita konstrusaun uma ba komunidade afeitadu ba konstrusaun Aeroporto no konstrui uma ba komunidade afetadu ba alargamentu Aeroporto Holbelis.
Hafoin ne’e, Governante ho ekipa Woodside Energy hakat mai iha aldeia Fatuisin, suku Camnasa ne’ebé simu ho liadadolin tuir kultura suku Camnasa no kontinua la’o hakat ba iha uma lisan Haemolin.
“Ida-ne’e previlejiu ida ba ha’u rasik, maibé Prezidente Timor GAP ho delegasaun sira ho ita-nia bainaka, Julie Fallon no nia delegasaun bo’ot husi Woodside ne’ebé hakat mai iha uma-lulik Fatu-Isin hodi observa ita nia dezenvolvimentu infraestrutura ba projetu tasi mane nian”, Ministru Petróleu Rekursu Minerál, Francisco da Costa, hato’o ba jornalista iha Kovalima, ohin.
Ho nune’e Governante hatutan: “Ami mai ho ekipa empreza Woodside ne’ebé ka’er hela kampu explorasaun iha Greater Sunrise ne’ebé parseiru Timor Gap. Empreza woodside mak sai hanesan operadór”.
Tanba ne’e, Ministru Francisco dehan ekipa Woodside mai observa direta fasilidade sira nune’e, Jullie Fallon rona direta, maibé la’ós rona husi Ministru Petróleu Rekursu Minerál de’it.
Prezensa MPRM ho ekipa Woodside atu hatene preparasaun Infraestrutura saida no planu saida mak Timor-Leste iha relasaun ho projetu tasi mane ne’ebé ligasaun ba petróleu no iha posibilidade oinsá mak dezenvolve kampu Greater Sunrise.
Komponente balun projetu tasi mane iha ligasaun ba prosesu dezenvolvimentu kampu Greater Sunrise. Governu iha nia planu industrializasaun iha Kosta Súl iha ne’ebé dezignadu atu hari’i Suai Supplay Base.
Preparasaun iha ona Aeroportu, segundu auto estrada, prosesu atu hari’i projetu Suai Supplay Base. Nune’e ekipa Woodside Energy haree planu no fasilidade ne’ebé iha parte ida sira-nia konsiderasaun no planu atu dezenvolve kampu Greater Sunrise.
Daudaun ne’e prosesu la’o tanba tama ona faze ikus konkursu públiku iha ona dezeñu inisiál bazeia bá kontratu.
Woodside sente onradu no apresia TL nia preparasaun ba projetu tasi mane
Iha fatin hanesan, Ezekutivu Vise Prezidente Technica Energy Development at Woodside Energy, Jullie Fallon, dehan ekipa Woodside sente ondradu bainhira hetan oportunidade no apresia preprasaun sira kona-ba kadoras no projetu Suai Supplay Base, tanba la’ós buat foun ne’ebé rona,maibé rona bebeik ona husi Timor Gap no Ministru Pretróleu Rekursu Minerál.
“Ami hakarak atu servisu hamutuk atu dudu projetu ba oin, nune’e ami kontinua servisu halo kooperasaun di’ak liután ho Ministru no mós Timor GAP hanesan ami nia parseiru ka joint venture,” nia dehan.
Jornalista : Celestina Teles
Editór: Florencio Miranda Ximenes
