VIKEKE, 30 Jullu 2025 (TATOLI)—Xefe Suku Laline, Postu Administrativu Lakluta, Munisípiu Vikeke, Zaquiel de Carvalho hateten katak daudaun ne’e presu foos kilógrama 25 tun ona bá $18.50 kompara ho antes ne’ebé presu sa’e ba 25.
“Tempu agora udan para ona ne’ebé folin foos ne’ebé uluk negosiante sira faan saku 25kg ho presu $25.00, agora tun ona ba $18.5,” Zaquiel ba TATOLI iha Postu Administrativu Lakluta, Munisípiu Vikeke, Kuarta ne’e.
Nia haktuir katak folin foos depende ba udan, maibé kuandu udan fali negosiante ho karreta labele asesu ba suku, automatikamente implika ba folin foos sa’e, tanba komunidade sira lori kuda bá sosa tiha foos iha Kribas (Manatutu) mak fa’an fali iha-ne’ebá.
Notísia relevante: Governu koordena empreza importadór normaliza presu foos
Fó hanoin fali katak husi loron-06 Fevereiru 2025 to’o fulan-Juñu foos kilógrama 25 ne’e kada saka ida folin $25 no kilógrama 20 ne’e kada saka folin $20.
Kona-ba kondisaun estrada ne’ebé aat, nia parte kada tinan hato’o beibeik ba Governu liuhusi Ministériu Obra Públika (MOP) atu hadi’a, maibé to’o agora seidauk iha resposta ruma.
Estrada liga bá suku ne’e maioria rai no tenke hakur mota We Aas, We Leu, We Dora, Derok Oan, mota Kao no mota hirak-ne’e seidauk iha ponte, nune’e sai risku ba komunidade tanba distánsia husi Postu Lakluta Vila ba Suku Ahik no Laline kuaze kilómetru 17.
Tuir dadus, Suku Laline iha aldeia lima (5) kompostu husi Aimeti-Hun, Fatu-Kedo, Mau-Ama, Mikradek no Santu Antonio, ne’ebe ho totál populasaun liu ema na’in-943.
Jornalista: Vitorino Lopez da Costa
Editór: Xisto Freitas da Piedade
