DILI, 13 Agostu 2025 (TATOLI)—Vise-Reitór III Asuntu Estudantil Institute of Business (IOB), Luduvina Maria Vitor, hateten IOB loke kompetisaun ba estudante ensinu sekundáriu husi tékniku vokasionál, eskola katólika no ensinu sekundária jerál atu dezenvolve sira-nia talentu iha públiku.
Objetivu hosi kompetisaun ne’e, nia esplika, atu selebra loron aniversáriu IOB ba dala-23 ne’ebé sei monu iha 20 Agostu tinan ne’e.
“Ami-nia esperansa katak ami bele konvida no envolve estudante eskola sekundária sira no ami-nia estudante atu hamoris liután atividade estrakurrikulár. Joven estudante sira-nia talentu barak tebetebes, tanba ne’e aproveita ida-ne’e hodi fó espasu ba sira dezenvolve liután sira-nia koñesimentu,” Luduvina ba TATOLI iha resintu IOB, Fomentu II, Dili, Kuarta ne’e.
Luduvina akresenta estudante la’ós de’it foka ba atividade kurrikulár maibé estrakurrikulár mós importante tanba oinsá hanorin sira hodi hakle’an liután sira-nia koñesimentu iha área diskursu, múzika no mós iha moda nian.
Nia subliña eskola sekundária jerál, eskola tékniku vokasionál inklui eskola katólika hamutuk sanulu (10) mak rejistadu iha IOB hodi partisipa iha kompetisaun referida.
“Ami fó konvite hotu bá eskola sira iha Dili laran maibé sira-ne’ebé mai rejistu ne’e eskola hamutuk sanulu kompostu husi Eskola São Pedro, Amigo de Jesus, São José Operário, ETI Dili, Eskola CAFE, Eskola Nicolau Lobato, Eskola 28 de Novembro, Eskola Sekundáriu Jerál 10 Dezembru no rua seluk tan,” Luduvina haktuir.
Nia hateten kompetisaun referida la’ós loke de’it ba eskola sekundáriu sira maibé loke mós ba interna ne’ebé sei envolve estudante IOB rasik.
“Agora ba eskola sekundáriu jerál ami loke modalidade haat hanesan diskursu iha lian portugés, diskursu lian inglés, iha mós fashion show no mós karaoke,” nia esplika.
Vise-Reitór III Asuntu Estudantil ne’e hatutan modalidade haat ne’e IOB mak finansia tanba atu komemora loron IOB nian no hakarak festeja hamutuk ho estudante sira hosi eskola sekundária sira iha Dili.
“Tuir ami-nia proposta katak prémiu ne’ebé oferese ba primeiru lugár mak $150, segundu lugár $100 no terseiru lugár $75,” nia tenik.
Luduvida informa katak horisehik (12/08) ne’e hahú ona kompetisaun fashion show no mós solo. Fashion show fó-sai kedas rezultadu no solo kontinua ohin semi-finál no finál iha loron 16 Agostu.
“Horisehik fashion show ba alin mane ne’ebé primeiru lugar ne’e hosi eskola CAFE, segundu lugár hosi Eskola Téknika Informátika Dili no nafatin ho eskola CAFE. Ba alin feto sira primeiru no segundu lugár hosi eskola CAFE no terseiru lugár hosi Eskola Sekundáriu Jerál 10 Dezembru Komoro,” Luduvina esplika.
Iha kompetisaun ne’e, nia esklarese, IOB mós koopera ho parseiru sira hanesan ANM, Timor Telekom, Marie Stopes, BRI, BNU ho CLN hodi prenxe stand ne’ebé preparadu.
Iha fatin hanesan, Senadu IOB, Cardelio da Cruz informa katak iha eventu ne’e estudante entusiazmu tebes iha palku tanba hakarak promove sira-nia talentu iha públiku liuliu iha mundu diskursu nian, fashion show no solo.
“Liuhosi kompetisaun ne’e bele hasa’e liután sira-nia koñesimentu no kapasidade inklui mentál iha públiku,” nia subliña.
Eventu ne’e hahú husi 12-16 Agostu 2025, ne’ebé asiste direta hosi estrutura IOB ho nia estudante sira inklui funsionáriu IOB no estudante sira hosi eskola sekundária sanulu iha Dili.
Jornalista : Osória Marques
Editora : Julia Chatarina
