DILI, 15 Agostu 2025 (TATOLI) – Autoridade Munisipál Ermera propoin adisionál millaun $7 iha reuniaun Komité Revizaun Orsamentu (KRO) 2026, tanba tetu ne’ebé atribui husi Ministériu Finansa hamutuk millaun $10 la kobre ba nesesidade tinan oin.
Prezidente Autoridade Munisipál Ermera, José Martinho Soares, dehan valór adisionál ne’e atu finansia projetu hanesan infraestrutura bee nian, estrada rurál, harii postu agríkola iha Railaku no laboratóriu ba Obra Públika nian.
“Nia objetivu mak oinsá atu hatama reseita ba Estadu”, nia dehan iha Ministériu Finansa, iha Aitarak-Laran, ohin.
Prezidente autoridade ne’e salienta katak verba ne’e atu prioriza mós preparativu sira atu simu podér lokál ho foku ba rekursu umanu, administrasaun, organiza sidade, investe iha setór ekonómiku no seluk.
Tuir nia, podér lokál ne’e sai prioridade, tanba tuir Governu sentrál nia planu, iha 2027, sei hakat ba eleisaun kámara munisipál ba munisípiu sira ne’ebé prienxe ona kritériu mínimu.
Nia dehan Ermera preparadu atu asume kompeténsia desentralizada, konforme planeadu husi Governu sentrál.
Fundu adisionál ne’e tau mós prioridade iha área edukasaun, saúde, agrikultura no turizmu. “Aleinde infraestrutura bázika, kontinua konstrusaun estrada rurál, reabilitasaun ba postu saúde, konstrui edifísiu eskolár”, dehan.
Relasiona ho orsamentu 2025, Autoridade Munisipál Ermera ezekuta ona 60% husi millaun $12.
Jornalista: Nelson de Sousa
Editora: Maria Auxiliadora
