KOVALIMA , 18 Agostu 2025 (TATOLI) – Autoriade Munisípiu Kovalima liuhusi Servisu Munisipál Protesaun Sívil no Jestaun Dezastre Naturál fó ona nesesidade bázika ba instituisaun neen iha munisípiu Kovalima.
Diretór Servisu Munisipál Protesaun Sívil Jestaun Dezastre Naturál, João Martins, informa instituisaun neen ne’ebé mak sira oferese apoiu nesesidade bázika ne’e mak hanesan instituisaun madre sira iha uma-mahon Salele, Madre Son iha Santa Rosa, Maukatar, Fohorem, Beco no mós madre iha Canosa Suai no mós família vulneravel sira.
“Molok atu apoiu nesesidade bázika ne’ebé mak ita armazena, ami informa ba prezidente autoridade nune’e bele fó apoiu ba ema ne’ebé mak presiza tanba iha 2025 ne’e menus akontese dezastre naturál iha Kovalima” Dirijente SMPSJDN ,João Martins, relata ba TATOLI, iha nia servisu fatin Bairru Kosta, ohin.
Bazeia ba orientaun husi Prezidente Autoridade Kovalima katak Servisu Munisipál Protesaun Sívil Jestaun Dezastre Naturál atu identifika instituisaun sira nune’e bele fó apoiu nesesidade bázika iha armajen.
Ho nune’e prosesu fó apoiu, balun servisu munisipál protesaun sívil mak halo identifikasaun, maibé balun submete pedidu direta hodi husu apoiu nesesidade bázika hafoin simu pedidu ekipa fó kedas apoiu direta.
“Durante fó apoiu nesesidade bázika ami mós servisu hamutuk ho Ministériu Solidariedade sosiál no Inkluzaun (MSSI) liuhusi Sentru Solidariedade Sosiál Kovalima bainhira la iha stock informa ba ami bele fó apoiu” nia esplika.
Nesesidade bázika ai-han ho la’ós ai-han ne’ebé mak durante fó apoiu ne’e mak hanesan foos, supermie, biskuit, masin, pasta-nehan (Pepsodent), manta, eskova nehan, toalla, sabaun no rinso. Maibé, kona-ba dadus hira mak distribui, nia parte la lembra.
Estoke nesesidade bázika iha armajen Servisu Munisipál Protesaun Sívil Jestaun Dezastre Naturál sufisente hela atu responde situasaun emerjénsia to’o iha fulan-dezembru 2025 to’o Marsu 2026.
Fó hanoin fali katak Prezidente Autoridade munisípiu Kovalima Miguel Armada Cardoso iha loron 01 Jullu 2025 ne’e, hahú fó apoiu nesesidade bázika ba instituisaun Madre sira iha uma Mahon Salele mak hanesan foos saka 10, supermie kaixa 25, biskuit kaixa ida, masin kaixa ida, pepsodent pakote lima, manta 20, eskova nehan pakote lima, toalla 20, sabaun nuvo kaixa ida no rinso kaixa ida.
Jornalista :Celestina Teles
Editór: Rafael Ximenes de A. Belo
