DILI, 28 agostu 2025 (TATOLI) – Primeiru-Ministru, Xanana Gusmão, hateten importánsia husi Dili Internasionál Trade Expo (DITE) 2025 mak atu hakbiit mikro, pekena, no médiu empreza sira ne’ebé nu’udar pilár ba esportasaun produtu lokál sira no sai hanesan kreximentu ekonómiku nasionál.
Xanana deskreve expo komérsiu dahuluk Timor-Leste nian hanesan oportunidade estratéjika ida atu hatudu inovasaun nasionál, kultura, no teknolojia, enkoraja mós kolaborasaun entre setór sira no habelar asesu ba merkadu produtu Timor-Leste nian.
“Expo ne’e hanesan oportunidade ida ba Timor-Leste nia emprezáriu sira, empreza ki’ik, no médiu sira atu fahe no aprende ba malu. Nune’e mós oportunidade ida atu haburas kolaborasaun entre setór oioin,” Xanana hateten bainhira halo abertura ba DITE 2025 iha Sentru Konvensaun Dili, ohin.
Eventu ne’e hatudu variedade husi Timor-Leste nia produtu prinsipál sira ne’ebé fa’an no esporta ona iha nivel internasionál, inklui kafé no alkoól ne’ebé hetan prémiu, masin no xokolate orgániku, serámika, artezanatu, no roupa tradisionál.
Tuir Xanana, kada produtu ne’ebé prodús iha rai-laran no fa’an iha rai-li’ur la’ós de’it hametin independénsia ekonómika, maibé hamosu mós rendimentu ba família no komunidade sira.
“Papél krusiál mikru pekena, médiu empreza nian nu’udar oin ba ekonomia Timor-Leste nian iha komunidade lokál sira, hahú husi kooperativa kafé nian iha foho, no soru-na’in tais sira iha aldeia sira, to’o empreza dijitál sira ne’ebé foinsa’e sira mak inisia. Governu nia responsabilidade mak atu apoiu setór privadu liuhusi simplifika regulamentu, hadi’a infraestrutura, no promove produtu lokál iha merkadu internasionál”, dehan.
Nia subliña katak dezenvolvimentu ekonómiku ne’ebé sustentavel tenke bazeia ba produsaun lokál, inovasaun, no esportasaun.
“Produtu timoroan idaidak ne’ebé troka importasaun hametin ita-nia soberania. Produtu idaidak ne’ebé komersializa iha rai-li’ur lori rendimentu ba família sira no fó signifikadu loloos ba ita-nia soberania”.
Primeiru-Ministru hatutan katak expo ne’e sai mós hanesan plataforma ida hodi promove kultura timoroan nu’udar rikusoin ekonómiku. “Kultura la’ós de’it sentrál ba identidade nasionál, maibé mós haburas orgullu, unidade, no kriasaun meiu subsisténsia ba komunidade”.
Xanana subliña importánsia husi expo ne’e hodi simu adezaun Timor-Leste nian iha ASEAN iha fulan-Outubru, ne’ebé sei loke merkadu ho ema liu millaun 600. “Ho polítika no apoiu ne’ebé loos, ita bele aproveita pozisaun ida-ne’e hodi habelar komérsiu, harii indústria, no kria empregu foun sira”, nia hateten.
Notísia relevante: Timor-Leste hatudu nia pontensiál ekonomia lokál iha DITE 2025
Jornalista: Arminda Fonseca
Editora: Maria Auxiliadora
