OEKUSI, 01 Setembru 2025 (TATOLI) – Membru Autoridade iha Rejiaun Administrativa Espesiál Oekusi Ambeno (RAEOA) ne’ebé hetan ona ezonerasaun husi Konsellu-Ministru, segunda ne’e, ofisialmente entrega ona viatura Estadu ba iha Diresaun Rejionál Patrimóniu Estadu Oekusi.
Notísia relevante:Rogério Lobato suspende projetu emerjénsia 154 ne’ebé simu ona orden serbisu
Molok entrega, Diretór Diresaun Patrimóniu Estadu Oekusi, Gonzalo dos Remedios, esplika kritériu no utilizasaun inklui halo verifikasaun tanba sasán Estadu nian tenke entrega ho kondisaun seguru no kompletu.
“Tuir sira-nia kompeténsia nu’udar servidór iha RAEOA, to’o de’it horikalan tuku 12:00, 31 Agostu 2025, tan ne’e ohin diretamente mai entrega fila-fali sasán Estadu nian, ne’ebé durante ne’e sira utiliza hodi hala’o serbisu, dokumentu sira-ne’e iha ona ha’u-nia liman, ami haree ona, ne’ebé kondisaun ho dokumentu kompletu,” nia informa iha Diresaun Rejionál Patrimóniu Estadu Oekusi, ohin.
Nia hateten, tuir loloos, tenke entrega iha loron Sábadu 30 Agostu 2025, maibé ladun hetan informasaun kredivel, entaun só Prezidente Autoridade RAEOA nian ho ZEEDOA mak entrega ona iha loron Sábadu semana kotuk.
“Molok sira entrega, parte diresaun mós halo verifikasaun no identifikasaun, tanba sasán Estadu nian, tenke entrega ho kondisaun di’ak no kompletu, karik la kompletu presiza mós halo justifikasaun,” nia hateten.
Notísia relevante:Ba estrutura foun, Rogério Lobato: “Haree ema hotu hanesan timoroan”
Iha biban ne’e, Sekretária Rejionál Edukasaun no Asuntu Sosiál, Inácia Tamele, agradese konfiansa ne’ebé simu durante tinan ida fulan hitu, no rekomenda estrutura foun atu kontinua progresu serbisu ne’ebé husik hela nune’e bele dezenvolve Oekusi.
“Ohin ami mai entrega ona fasilidade no karreta sira, durante tinan ida fulan hitu, Governu fó fiar mai ami atu serbí iha Autoridade RAEOA, ne’ebé ohin ami entrega karreta ho kompletu. Ami agradese ba Governu, no espera saida mak halo ona bele kontinua, ita hotu nia mehi hakarak hadi’a rai ne’e, liuliu Oekusi Ambeno,” nia apresia.
Notísia relevante:PM Xanana nomea Régio da Cruz sai Prezidente Autoridade RAEOA
Entretantu, membru Autoridade ezoneradu sira-ne’ebé entrega viatura Estadu sira mak hanesan, Sekretária Rejionál Edukasaun no Asuntu Sosiál, Inácia Tamele, Sekretária Rejionál ba Asuntu Agrikultura Filomena Sila, Sekretáriu Rejionál ba Asuntu Saúde Luís de Jesus Neno, Sekretáriu Rejionál ba Asuntu Administrasaun Andre La’o, Sekretáriu Rejionál ba Asuntu Terra Propriedade, Marcelino Marques Coro.
Antes ne’e, iha reuniaun Konsellu Ministru, Kuarta (27 Agostu 2024) ne’e, Governu liuhusi reuniaun Konsellu-Ministru aprova projetu rezolusaun ba ezonera estrutura hahú husi Prezidente no membru autoridade Rejiaun Administrativa Espesiál Oekusi Ambenu (RAEOA) iha 31 Agostu 2025.
Durante reuniaun ne’e, Primeiru Ministru Kay Rala Xanana Gusmão aprezenta rezolusaun kona-ba Rejiaun Administrativa Espesiál Oekusi Ambenu (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Iha dokumentu ofisiál portál Governu deklara katak, Governu sei ezonera Prezidente no membru autoridade RAEOA nian hahu iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Aleinde ne’e, Governu mos nomea hotu estrutura husi kargu diresaun no xefia sira iha Rejiaun Administrativa Espesiál Oekusi Ambenu (RAEOA) mak hanesan;
Domingos Punef asume knaar nu’udar Diretór-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovizionamentu; Amâncio Aguido Punef nu’udar Diretór Rejionál Finansas; MeritaMarques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál.
Nune’e mós Governu nomea José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria; Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Teno nu’udar Diretór Rejionál Terras no Propriedade no Herculano Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambenu (ZEEDOA).
Notísia relevante:Rogério Tiago Lobato nomeadu nu’udar Prezidente Autoridade RAEOA ba tinan-lima
Jornalista: Abílio Elo Nini
Editór: Rafael Ximenes de A. Belo
