DILI, 03 Setembru 2025 (TATOLI)—Diretór Servisu Saúde Munisípiu Ermera, Antonio de Deus, informa hahú husi fulan-Janeiru to’o fulan-Jullu tinan 2025, Servisu Saúde Munisípiu Ermera jejista pasiente moras dengue hamutuk na’in-32.
Notísia Relevante: OMS entrega ona sertifikadu livre husi Malária ba MS
Nia hateten, husi númeru ne’e sira rejista feto na’in-16 no mane na’in-16, no husi númeru ne’e la iha ema ida mak mate no pasiente sira-nia kondisaun daudaun ne’e mesak di’ak.
“Iha Janeiru rejista kazu rua (2), iha Fevereiru kazu rua (2), iha Marsu kazu lima (5), Abríl kazu neen (6), Maiu kazu ualu (8), Juñu kazu tolu (3) no Jullu kazu neen (6), ne’ebé totál kazu hamutuk 32,” ‘Diretór Servisu Saúde Munisípiu Ermera Antonio de Deus, hatten ba Agência Tatoli liuhusi telefónika, ohin.
Nia informa, daudaun ne’e Servisu Saúde Munisípiu Ermera kontinua halo sensibilizasaun no promosaun edukasaun saúde ba komunidade no mós ba estudante sira iha eskola sira atu nune’e bele hasa’e sira-nia koñesementu kona-ba prevensaun ba moras dengue ne’e.
“Ba prevensaun ne’e, agora ami halo mak nafatin hasa’e frekuénsia promosaun saúde ba eskola no komunidade oinsá atu halo prevensaun ba moras sira-ne’e,” nia dehan.
Jornalista : Felicidade Ximenes
Editór : Cancio Ximenes
