DILI, 08 Setembru 2025 (TATOLI)—Ministru Obra Públika (MOP), Samuel Marçal, hateten prosesu projetu reabilitasaun estrada ligasaun Urahou-Maubisse ba Postu Administrativu Turiskai, Munisípiu Manufahi ho kilómetru 12 ne’e foin atinje 30% tanba impaktu husi klima.
Notísia Relevante: Estrada ligasaun Urahou-Turiscai sei konstrui iha tempu besik
“Projetu ne’e la’o tarde uitoan tanba impaktu husi klima. Udan beibeik foin mak para, entaun difikulta kompañia atu halo atividade,” Ministru Samuel hateten ba jornalista sira iha Palásiu Governu, segunda ne’e.
Nia dehan, empreza hakarak atu aselera lalais projetu ne’e maibé iha difikuldade kona-ba klima no ekipamentu balu avaria mak prejudika servisu iha área referidu ladun la’o.
Obra ne’e, kaer husi empreza lokál Montana Diak bazeia ba akordu ne’ebé selebra iha loron 13 fulan-Juñu 2024 ho valór kontratu millaun $3.4 ho durasaun konstrusaun tinan ida-resin.
Ministru Samuel esplika, Governu deside empreza Montana Diak mak sai manán-na’in tanba iha ekipamentu ne’ebé kompletu no besik kedan iha fatin referidu.
“Ita identifika kompañia Montana Diak tanba ninia mákina no fatin fábrika fatuk krikil iha ne’e mós iha,” nia dehan.
Jornalista : Alexandra da Costa
Editór : Cancio Ximenes
