OEKUSI, 08 Setembru 2025 (TATOLI) – Sekretáriu Estadu Protesaun Sívil (SEPS), Domingos Mariano Reis, segunda ne’e, oferese foos saka 500 ho marka fortified net weight kilograma 25 ba suku 20 iha Rejiaun Administrativa Espesiál Oekusi Ambeno (RAEOA), hodi responde ba vítima dezastre naturál ba iha Oekusi.
Molok, entrega apoiu hirak ne’e, Sekretáriu Estadu Protesaun Sívil (SEPS), Domingos Mariano Reis, hala’o enkontru dahuluk hodi solisita Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, ne’ebé foin eleitu hodi troka Prezidente Sesante, Rogério Tiago de Fátima Lobato.
“Ami-nia objetivu mai iha Oekusi, iha objetivu rua de’it; primeiru atu distribui hela ai-han uitoan liuhusi foos ba Prezidente Autoridade RAEOA atu prepara hodi apoia hela ba ita-nia komunidade sira-ne’ebé vulneravel, tanba dezastre naturál. Objetivu daruak, ami mai halo koordenasaun ho Prezidente Autoridade RAEOA atu selebra aniversáriu ba dezastre nian iha Oekusi iha loron 13 Outubru,” nia hateten ba jornalista sira, hafoin hala’o enkontru kortezia ho Prezidente Autoridade RAEOA iha Oekusi, ohin.
Hafoin simbólika oferese ba Prezidente Autoridade RAEOA, Governante ne’e apela ba suku 20 iha Oekusi, atu labele fa’an tutan tan ba merkadu, maibé utiliza hodi sustenta nesesidade família.
Notísia relevante:Rezidénsia monu, Inan-faluk Joana hamonu matan-been bainhira hetan vizita hosi autoridade
Iha biban ne’e, Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, hato’o agradesimentu ba Sekretáriu Estadu Protesaun Sívil (SEPS), tanba Oekusi nu’udar rai enklave presiza mós tau matan husi Governu Sentrál.
“Ita hotu hatene, Oekusi nu’udar rai enklave, ita-bele ko’alia merkadu maibé ita mós ko’alia ba obrigasaun, nune’e ita asegura reziliénsia rai no povu. Ida-ne’e refleta ba iha Governu Sentrál liuhusi SEPS mai APC Oekusi, ajuda ita atu fanun nafatin kona-ba reziliénsia povu ne’e,” nia dehan.
Iha biban ne’e, Xefe Suku Kutete, José António Bana, agradese Governu tanba konsidera pedidu ne’ebe antes ne’e autoridade komunitária sira submete hodi hetan atensaun.
“Dadus sira-ne’e, ami mak rekolla tanba ita-nia inan-aman balu liuliu ferik-katuas, bainhira hetan dezastre seidauk hetan ajudu ruma husi Governu. Ne’ebé, ita agradese bele apoia ona, maske volume ki’ik maibé bele sustenta ita-nia komunidade liuliu sira-ne’ebé vítima ba dezastre naturál,” nia orgullu.
Entretantu, husi foos 500 ne’e, sei distribui ba suku 20, kada suku sei hetan foos saka 25.
Notísia relevante:APC rejista dezastre naturál neen iha Juñu nia laran
Jornalista: Abílio Elo Nini
Editór: Rafael Ximenes de A. Belo
