DILI, 17 Setembru 2025 (TATOLI) – Institutu Nasionál Dezenvolvimentu Mão-de-obra (INDMO) no South Australia Skills Commission (SASC) asina ona memorandu entendimentu kona-ba Formasaun iha Konstrusaun Sivíl nian ba timoroan na’in-10 atu partisipa kursu ne’e iha Austrália.
Akordu ne’e formaliza iha Fórum Industriál kona-ba Edukasaun no Formasaun Téknika no Profisionál (TVET, sigla inglés), hanesan parte ida husi Semana Internasionál Abilidade ba da-2, ne’ebé hala’o iha Sentru Konvensaun Dili.
Komisáriu Abilidade Austrália Súl, Cameron Baker, hateten memorandu ne’ebé parte rua halo ne’e hanesan ksolok ida ba sira atu apoiu dezenvolvimentu nasaun Timor-Leste nian.
Diretór ne’e relata katak projetu pilotu ida-ne’e sei envolve inisialmente formandu na’in-10, no programa ne’e sei hahú iha inísiu trimestre dahuluk tinan 2026 nian.
“Iha fulan-Novembru, ami sei mai fali halo selesaun ba joven sira ne’ebé iha ona abilidade konstrusaun nian, liuliu sira ne’ebé tuir ona formasaun konstrusaun nian no balun ne’ebé tuir ona área estudu konstrusaun nian sei bá tuir formasaun iha Austrália”, Cameron Baker hateten.
Nia esplika katak Formasaun Konstrusaun nian, sira-nia foku mak joven sira ne’ebé iha ona abilidade soldadura, konstrusaun uma, nahe azuleju, pintura no dekorasaun interiór, no seluk tan.
“Bainhira ami halo ona selesaun, joven sira bá tuir formasaun hetan sertitifakadu mak foin fila. Ami kontinua fó oportunidade ba joven sira seluk, tanba MoU ne’e laiha limitasaun. Akordu inísiu mak Formasaun Konstrusaun nian, maibé mós ba oin bele área barak tan hanesan analiza teknolojia informasaun nian no área sira seluk husi ekonomia no kuidadu saúde nian”, nia hateten.
Diretora INDMO, Isabel Fernandes de Lima, afirma katak formasaun ne’e la’ós ba joven sira ne’ebé partisipa ona iha sentru formasaun sira, maibé mós ba estudante sira ne’ebé aprende ona kona-ba indústria konstrusaun nian.
“Importante maka sira domina lian, nune’e sira bele kompete iha área ida-ne’e, nune’e bá tuir formasaun hodi hetan esperiénsia filafali mai dezenvolve ita-nia rai”, konklui.
Notísia relevante: Semana Abilidade Internasionál 2025: Impulsiona inovasaun ba integrasaun globál
Jornalista: Arminda Fonseca
Editora: Maria Auxiliadora
