BOBONARU, 23 Setembru 2025 (TATOLI)-Autoridade Munisípiu Bobonaru (AMB) no Sekretariadu Tékniku Administrasaun Eleitorál (STAE) organiza eleisaun ba xefe aldeia Oe-leu Taz, iha suku Oe-leu, postu administrativu Bobonaru.
Votasaun tuir kultura ne’e nia rezultadu apuramentu hatudu Rita de Lima Morais mak eleita sai xefe aldeia Oe-leu Taz ho votus 51 hafoin halakon Bendito Soares ho votu 30, husi totál eleitór 81.
Sekretáriu Autoridade munisípiu Bobonaru ba Asuntu Sosiál no Organizasaun Komunitária, Júlio Carvalho Cerro, informa eleisaun ne’e akontese tanba xefe aldeia sesante rezigna-an iha fulan-Abríl liubá.
“Ohin ami halo prosesu ba elisaun xefe aldeia foun, la’o tuir regra ne’ebé iha, katak primeiru ami forma meza, kompostu husi delegadu ho sira na’in hira mak dirije meza. Depois prienxe dukumentu tuir lei no regulamentu iha STAE nian. Ami mós la’o tuir matadalan ne’ebé iha. Partisipasaun ladun másima, maibé sira konsege halo votasaun tuir kultura nian, rezultadu ikus inan-feton ida naran Rita Morais mak eleita sai xefe aldeia Oe-leu Taz”, nia esplika iha suku Oe-leu, ohin.
Diretór STAE Delegasaun Territoriál munisípiu Bobonaru, Mariano Viegas Amaral, reforsa katak eleisaun ne’e la’o ho transparante no demokrátiku tanba komunidade mak lidera meza.
“Ami la subar, halo tuir prosesu demokrasia. Buat hotu ohin halo ne’e ami husu imi,l ho imi nia hanoin mak ami halo atividade sira ne’e. Rezultadu iha ona, ami hodi xefe aldeia foun nia naran ba simu husi postu depois ba autoridade no sei publika iha Jornál Repúblika. Kuandu publika ona labele temi tan naran ida ilegál ne’e, tanba buat hotu liu prosesu”, nia afirma.
Diretora Organizasaun Apoia Suku, Autoridade Munisípiu Bobonaru, Engracia Soares, kontente tanba komunidade eleje kofiansa ba feto ida hodi lidera aldeia Oe-leu Taz.
“Ita iha aldeia 193, husi númeru ne’e mane mak barak, maibé ohin feto ida sai tan xefe aldeia iha Bobonaru hamutuk 14 ona. Feto aumenta tan ne’e diak ona, signifika feto mós brani no bele sai lideransa”, Engracia salienta.
Biban ne’e, Xefe Suku Oe-leu, Januário Meta Tae Bragança, agradese ba Autoridade Bobonaru no STAE ne’ebe realiza ona eleisaun ne’e hodi kompleta estrutura suku.
Eis estadeta FALINTIL fronteira súl ne’e akresenta katak dezde xefi aldeia sesante rejigna-an, liuhusi enkontru suku, autoridade suku, delegadu-delegada no reprezentante lia-na’in fó konfiansa ba Rita de Lima Morais lidera aldeia Taz provizóriu ho voluntariamente hodi organiza atividade simu vizita Krús Joven no konstrusaun Kapela Oe-leu.
“Ikus mai povu hili duni nia nu’udar xefe aldeia foun. Ha’u-nia mensajen mak esforsu-an nafatin, sebisu hamutuk ho komunidade ho l xefe suku organiza malu, nune’e suku ida-ne’e labele abandonadu”, nia hato’o.
Tuir Observasaun Jornalista iha terrenu, prosesu eleisaun hahú no remata ho ambiente hakmatek no dame.
Tuir planu, iha dadeer ne’e, AMB ho STAE atu realiza eleisaun iha aldeia Oalgomo, suku Ai-Asa, maibé tanba la prinxe kriteria, lei no regulamentu maka eleisaun adia fali ba tempu seluk. Aleinde ne’e, aban AMB no STAE kontinua realiza eleisaun ba xefi aldeia ida iha suku Batugadé, postu administrativu Balibó.
Jornalista: Sergio da Cruz
Editora: Maria Auxiliadora
