DILI, 01 Outubru 2025 (TATOLI)-Komisáriu Anti-Korrupsaun (CAC, sigla portugés), Rui Pereira dos Santos, ho ekipa hala’o audiénsia ho Prezidente Parlamentu Nasionál, Maria Fernanda Lay, hodi relata serbisu sira ba prevensaun no sensibilizasaun, investigasaun kriminál, servisu apoiu no kooperasaun.
Rui Pereira hateten iha inspesaun no monitorizasaun ne’ebé hetan instrusaun direta husi Primeiru-Ministru, Xanana Gusmão, atu monitoriza projetu abandonadu sira ne’e konsege obriga emprezáriu sira kontinua fali serbisu hafoin paradu iha tinan balu nian laran.
Hodi fó opsaun rua katak kontinua obra no finaliza no bainhira la kumpre mak prosesa kriminál tuir Lei Nu. 7/2020, loron 26 Agostu, Medida Prevensaun no Kombate Korrupsaun.
“Maioria emprezáriu sira ne’ebé abandona projetu iha munisípiu Ermera, Likísa, Aileu, Dili, Bobonaru, Manufahi, Ainaru, Vikeke, no Oekusi, ikus mai hili kontinua obra no finaliza serbisu”, nia hato’o.
Iha atividade prevensaun krime korrupsaun nian, halo ona arrolamentu ba ajente públiku sira hamutuk na’in-10.746 no funsionáriu públiku 12.088 mak deklara ona rikusoin.
No aplika sansaun 25% ko’a saláriu baze mensál ba infratór na’in-2.895 dezde husi tinan 2024 no rekolla ona koima $357.813,47.
Nia relata mós katak Diresaun Investigasaun Kriminál ho Ministériu Públiku (MP) atu halo investigasaun konjuntu ba kazu lubun iha Oekusi. “Sei halo joint investigation mak kazu sosa aviaun ZEEMS o Ró Haksolok”, dehan.
CAC simu keixa 70
Rui Pereira informa mós katak CAC simu keixa husi públiku hamutuk 70, halo prosesu averiguasaun 25, la kontinua prosesu 39 tanba laiha indísiu krime no neen halo auto-partisipasaun ba iha MP.
Nia hateten, CAC la halo diskriminasaun ba prosesu kriminál no hala’o serbisu ho profisionál la haree ba kór polítiku no estatutu sosiál.
Prezidente Parlamentu Nasionál, Maria Fernanda Lay, elojia serbisu CAC ba kombate korrupsaun iha país.
Relembra katak Komisáriu CAC, Rui Pereira dos Santos, simu pose husi PPN iha fulan-Juñu 2024 ba mandatu tinan haat.
Jornalista: Nelson de Sousa
Editora: Maria Auxiliadora
