DILI, 02 Outubru 2025 (TATOLI)—Ministra Edukasaun (ME), Dulce de Jesus Soares informa konstrusaun Ensinu Báziku Sentrál (EBC) 05 Maiu Bekora iha ona prosesu legál.
“Normalmente ita sei haree. Se empreza mak la tuir rekizitu no responsabilidade ne’ebé iha, ministériu bele foti medida seluk atu haree fali dalan saida ka tuir lei aprovizionamemtu atubele haree prosesu ne’e bá-oin,” nia dehan ba jornalista sira iha resintu Pré-eskolár Moris Foun Fatumeta, Kinta ne’e.
Tanba, nia dehan, tékniku husi Ministériu Edukasaun hamutuk ho Ajénsia Dezenvolvimentu Nasionál (ADN) ba haree ona, no loos duni katak sira la prenxe rekizitu husi kontratu ne’ebé iha.
Ministra ne’e hatutan, kona-ba sansaun mak tenke hapara kontratu no loke fali konkursu ba empreza seluk, atubele kontinua nia prosesu konstrusaun hodibele finaliza prosesu referidu.
Projetu konstrusaun EBC 05 Maiu Bekora iha saladeaula ualu inklui biblioteka, hahú iha loron 20 Abríl 2022 no tuir planu sei ramata iha 20 Outubru 2022 maibé to’o agora paradu. Obra ne’e responsavel husi Empreza Maluk Unipessoal, Lda, ho totál kustu $355.628,46.
Aleinde ne’e, Ministra dehan prosesu konstrusaun eskola CAFE Likisá, eskola CAFE Ainaru, inklui konstrusaun Eskola 05 de Maiu Bekora, daudaun ne’e ministériu hala’o hela revizaun ba kontratu.
Dulce esplika maioria projetu sira iha tinan 2024 kuaze konklui saladeaula kuaze 54 no sira-ne’ebé iha tinan 2025 sei iha prosesu hela.
“Maibe ami garante katak iha 2025 kuaze projetu 14 ne’ebé daudaun ne’e iha andamentu, maiória sira bele finaliza ona,” nia hakotu.
Entretantu, Diretór Servisu Edukasaun Munisípiu Ainaru, Patrício da Costa Magno hateten ninia parte informa ona ba Ministériu Edukasaun sobre konstrusaun eskola Sentru Aprendizajen no Formasaun Eskolár (CAFÉ-sigla portugeza) iha Ainaru ne’ebé paradu.
Nia tenik ME halo ona xamada daruak ba kompañia, tanba la kontinua servisu. “Ami informa no rekomenda ona ba Ministériu Edukasaun iha fulan-Janeiru liubá katak loke fali konkursu para konstrusaun ne’e bele kontinua la’o,” nia propoin.
Tuir dirijente ne’e katak kompañia ninia kapasidade limitada atu kaer obra ho orsamentu neʼebé boot. Tanba ne’e, konstrusaun foin atinje pursentu 15. “Ida 15% ne’e osan fó ona maibé nia la kontinua entaun la transfere osan ona,” nia realsa.
Patrício informa kompañia neʼebé responsabiliza ba konstrusaun eskola CAFE naran Roman Junior, ho nia orsamentu hamutuk $907.735,20, kontrusaun ne’e hahú iha tinan 2020.
Jornalista: Osória Marques
Editór: Xisto Freitas da Piedade
