DILI, 03 Outubru 2025 (TATOLI) – Incanto International Institute realiza, iha sesta kalan, serimónia graduasaun ba estudante finalista na’in-18 ne’ebé termina ona formasaun lia-inglés durante fulan tolu.
Formasaun ne’e ho kategoria klase regulár sira disponivel ba nivel hotu-hotu, inisiál, elementár, pré-intermédiu, intermédiu no admisaun.
“Sira ne’ebé gradua ona ne’e hamutuk na’in-18, sira ne’e etapa primeira husi formasaun iha fatin ida-ne’e. Sira ne’e fero na’in-12, mane neen”, na’in ba Incanto International Institute, Joanico Jerónimo, hateten ba jornalista sira hafoin remata serimónia graduasaun.
Nia esplika katak objetivu husi formasaun ne’ebé Incanto International Institute loke ne’e atu fó biban ba timoroan sira bele hasa’e liutan sira-nia koinesimentu no abilidade iha inglés, nune’e bele fó serbisu ba sira-nia an rasik iha Timor-Leste no diáspora.
“Incanto International Institute loke formasaun lia-inglés ida-ne’e tanba ita haree timoroan barak mak hakarak serbisu iha rai-li’ur, maibé sira-nia nivel ba inglés ne’e mínimu tebes, entaun Incanto hanesan ponte ida hodi rezolve problema ida-ne’e”, Joanico esplika.
Nia dehan serbisu barak ne’ebé oferese husi Austrália no daudaun ne’e Timor-Leste atu adere ba ASEAN no inglés hanesan barreira boot ba timoroan.
“Ida-ne’e mak Incanto hamriik ho padraun ida internasionál no formasaun inglés ida nia báziku Reinu Unidu nian ida-ne’e hanesan abilidade ida ba sira atu buka serbisu ba sira-nia an iha nivel ázia no ba mundu”, dehan.
Formasaun ne’e hahú iha tinan 2024 ho nia kritéria mak hanesan lia-inglés iha faze jerál fulan tolu husi segunda-sesta hodi kompeleta oras 170.
Formadór na’in-15 ne’ebé fó formasaun ba estudante hirak ne’e mai husi Austrália, Estadu Unidu Amerika (EUA) no timoroan bal.
“Ha’u fiar katak estudante hirak ne’e bele ko’alia ona inglés, maski ladún perfeitu, maibé natoon ona ba sira. Atu ko’alia di’ak liután ne’e dalaruma iha sira-nia mentalidade seidauk to’o iha lideransa ne’ebé aas, maibé ba oin sira bele”, nia espera.
Iha fatin hanesan, Adjuntu Diretór Ezekutivu Incanto International Institute, Manuel Vong, reforsa katak formasaun inglés ne’ebé Incanto loke, tanba realidade joven timoroan barak seidauk ko’alia inglés ho di’ak no susar atu hetan serbisu iha rai-li’ur no laran.
“Incanto loke formasaun ne’e tanba maioria husi ita-nia joven sira, liuliu sira ne’ebé remata husi universidade sira, liga ba merkadu traballu presiza iha kompeténsia no prátika ne’ebé profisionál atu liga serbisu ho sira. Entaun, saida mak importante só língua, liuliu inglés ida-ne’e mak ita loke formasaun ida ho kualidade”, Manuel Vong hateten.
Iha sorin seluk, graduadu Conssuela Vanesa Soi Soares kontente tanba formasaun ne’ebé hetan iha Incanto nia maneira hanorin diferente iha fatin seluk.
“Bainhira ha’u tama iha sentru formasaun ida-ne’e diferente tebes ho sentru sira seluk ne’ebé antes ne’e ha’u tuir ona formasaun. Antes ne’e, ha’u tuir formasaun iha Gress For Development (GFD) bainhira ha’u remata seidauk bele ko’alia ho di’ak. Maibé ha’u tama fali iha Incanto oinseluk loos, mai ho formadór internasionál hanorin ami di’ak tebes no ikus ha’u bele ko’alia inglés”, nia otimista.
Incanto sente orgullu atu haree estudante sira harii konfiansa iha ko’alia, rona, lee, no hakerek, orientadu husi treinadór sira ne’ebé iha paixaun ne’ebé lori métodu hanorin inovadór sira ba klase hotu-hotu.
Sentru Formasaun Inglés prinsipál Timor-Leste nian, ne’ebé rekoñesidu husi City & Guilds United Kingdom (UK) no padraun Avaliasaun Inglés Cambridge nian.
Prosesu administrasaun ba formasaun ne’e mak iha durasaun fulan tolu no kada fulan estudante sira selu $50 no fulan tolu ne’e sira selu hamutuk $150.
Jornalista: Hortencio Sanchez
Editora: Maria Auxiliadora
