DILI, 03 Outubru 2025 (TATOLI)—Ministra Edukasaun (ME), Dulce de Jesus Soares hateten kona-ba menus profesór iha eskola sira, ME presiza hein rezultadu identifikasaun tuir kuadru pesoál hafoin koloka profesór ba eskola ne’ebé menus.
“Ministériu Edukasaun hanesan ita-boot sira akompaña katak iha prosesu atu koloka bá iha eskola ne’ebé de’it, maibé presiza koloka profesór ne’e tenke tuir kuadru pesoál edukasaun nian. Husi kuadru pesoál mak ita bele deside katak eskola ida-ne’e presiza manorin na’in hira no iha disiplina saida? Ida-ne’e mak ita halo. Ita labele naran koloka,” Ministra Edukasaun dehan iha Fatumeta, Sesta ne’e.
Ministra tenik kolokasaun hotu-hotu ME halo bazeia ba kuadru pesoál tanba iha-ne’ebá presiza hatene estudante hira, saladeaula hira, fahe turnu hira, hafoin bele hatene koloka profesór ba eskola.
“Ho situasaun sira hanesan ne’e, ita labele halo rekrutamentu ba de’it eskola sira, maibé ita tenke atualiza filafali ita-nia kuadru pesoál ne’ebé mak iha, nune’e ita bele koloka bazeia tuir kuadru pesoal ne’ebé iha,” Dulce esplika.
Notísia relevante: Profesór rekrutadu sei koloka bazeia ba kuadru pesoál
Entretantu, Responsavel Komisaun Nasionál Edukasaun Katólika Timor-Leste (CONECTIL-sigla-portugeza), Pe. António Quenser preokupa ho situasaun ne’ebé akontese iha eskola Katólika sira, tanba manorin kontinua menus hodi prejudika prosesu aprendizajen ba estudante sira.
“Ba estudante ne’ebé eskola iha eskola katólika ne’e la’ós ema seluk, la’ós maihusi rai seluk, maibé sira mós timoroan tanba eskola katólika sira sente ho mudansa tanba desizaun ba manorin ne’e hamosu impaktu, afeta ba prosesu aprendizajen,” Pe. Quenser haktuir.
Nia promete CONECTIL sei hamutuk ho Governu hodi rezolve problema iha eskola katólika sira.
“Ita buka hamutuk atu aprosima. Karik Governu hanoin di’ak, atubele subtitui filafali manorin hirak ne’ebé mak uluk sai, ne’e dalan di’ak liu atu hetan solusaun ne’ebé di’ak no Uma Kreda liuhosi fundasaun sira mós sei buka dalan atu rezolve lakuna sira-ne’ebé iha fundasaun sira,” nia subliña.
Prezidente CONECTIL ne’e promete, sei koko reuñiaun mós ho fundasaun eskola katólika sira, hodi buka meiu, iha polítika ne’ebé uniforme, nune’e bele solusiona problema iha eskola katólika sira iha nasaun.
Iha parte seluk, Koordenadór Eskola Ensinu Báziku Filiál Katólika, Maria Viane Bercoli, Abílio de Sousa husu Fundasaun Eskola Katólika no Dioseze Baukau atu halo rekrutamentu ba profesór foun atu labele fó impaktu ba prosesu aprendizajen.
Jornalista: Osória Marques
Editór: Xisto Freitas da Piedade
