DILI, 04 Outubru 2025 (TATOLI) – Ministériu Finansa husu ba Parlamentu Nasionál atu analiza no deside iha debate orsamentu kona-ba realokasaun fundu pensaun mensál vitalísia, tanba sei inklui hela iha Orsamentu Jerál Estadu (OJE) 2026 nian.
Xefe Unidade Komunikasaun Relasaun Públika Ministériu Finansa, Fernando Manuel Ribeiro, hateten iha loron 29 Setembru 2025, Prezidente Repúblika promulga Lei Revoga Pensaun Mensál Vitalísia ba Deputadu no Estatutu Titulár Órgaun Soberanu sira-nian no revogasaun ne’e laiha ona baze legál atu halo pagamentu tuir diploma revogadu sira ne’e.
“Prosesu revogasaun ne’e foin aprova hafoin Governu finaliza tiha ona proposta Orsamentu Jerál Estadu tinan 2026, tanba ne’e maka projetu OJE sei inklui nafatin hela liña ida neʼebé dedika ba programa pensaun vitalísia. Maibé, lei revoga tiha ona, agora ne’e kabe ba Parlamentu atu analiza no deside iha debate orsamentu oinsá atu realoka fundu ida-nee”, xefe unidade ne’e informa ba jornalista sira iha konferénsia imprensa ne’ebé hala’o iha Aitarak-Laran, ohin.
Tanba ne’e, Ministériu Finansa garante ba populasaun katak osan sira ne’e sei la uza ba objetivu sira ne’ebė prevee ona antes, hanesan determina husi lejislasaun ne’ebé vigora, Governu só bele gasta rekursu públiku bainhira iha baze legál esplísita ne’ebé fó dalan.
“Governu laiha intensaun atu mantéin ka halo nafatin pagamentu tanba lei revoga tiha ona, rumór kona-ba utilizasaun verba ida-ne’e hodi uza nafatin ba objetivu pagamentu pensaun vitalisia ne’e la loos”, nia apela.
Tanba ne’e, Governu nafatin iha kompromisu atu jere finansa públika ho responsabilidade, transparente no sempre tuir lei.
Antes ne’e, iha loron 30 fulan-Setembru, Ministra Finansa, Santina Cardoso, fó-sai katak verba orsamentu ne’ebé prevee ba eis-titulár sira sei kontein hela iha proposta Orsamentu Jerál Estadu 2026, tanba verba ida-ne’e sei aprezenta ba Parlamentu Nasionál mak foti desizaun.
Nia dehan, proposta orsamentu pensaun vitalísia prevee hela liuhusi dalan ida fali, bainhira tama iha Parlamentu Nasionál tenke halo proposta (alterasaun). Enkuantu orsamentu ba tinan ida ne’e kuaze millaun $5 no ba tinan oin mós montante hanesan.
“Entaun, orsamentu sira-ne’e depende ba Parlamentu Nasionál mak deside atu aloka fali ba setór ida ne’ebé ka atu redús,” nia hateten.
Jornalista: Alexandra da Costa
Editora: Maria Auxiliadora
