DILI, 06 Outubru 2025 (TATOLI)— Prezidente Autoridade Rejiaun Administrativa Enklave Oekusi-Ambenu (RAEOA), Régio da Cruz, hateten autoridade RAEOA iha planu atu reativa operasaun voo aviaun Zona Espesiál Ekonómia Sosiál Merkadu (ZEEMS) ne’ebé daudaun ne’e Governu suspende hela.
“Ita-boot sira hatene aviaun ZEEMS ne’e hanesan aset RAEOA ninian, entaun ami iha ona planu feitu atu reativa. Ami fiar katak, antes fulan-Dezembru, aviaun ne’e bele halo fali operasaun voo nian hanesan baibain,” Prezidente Autoridade RAEOA ne’e informa ba jornalista sira iha Palásiu Governu, ohin.
Daudaun ne’e, sira mós sei kria jestaun operasionál foun iha governasaun ida-ne’e, entaun saida mak RAEOA investe ona ba Governu tenke iha ninia kontinuasaun, maske iha servisu administrativa nian ne’e, sira presiza haree tan buat balun maibé ne’e investimentu RAEOA nian normalmente tenke reativa.
“Aviaun ne’e sei semo fila-fali ho ninia mekanizmu foun. Kona-ba auditória interna nian la’o nafatin saida mak Governu hakarak halo no ami preparadu ho inisiativa ne’e rasik. Tanba ne’e, ami seidauk bele ko’alia detallu ba asuntu ne’e tanba prosesu la’o hela. Iha tempu badak, ami sei konvida mídia hodi halo kobertura bainhira ami públika ona,” nia esplika.
Entretantu, daudaun ne’e sira prepara ona dokumentu ofisiál balun no kria mekanizmu foun ba operasionál aviaun nian, hodi halo debate ba revizaun ne’ebé iha ba reativa operasaun aviaun ZEEMS nian husi Oekusi mai Dili.
Jornalista : Alexandra da Costa
Editór : Cancio Ximenes
