DILI, 07 Outobru 2025 (TATOLI)—Ministru Kultura Repúblika Indonézia, Fadli Zon, akompañadu husi Ministru Juventude Desportu Arte no Kultura, Nélyo Isaac Sarmento, no Embaixadór Indonézia iha Timor-Leste, Octo Dorinus manik, hala’o enkontru ho Primeiru-Ministru, Kay Rala Xanana Gusmão, hodi hametin lasu kulturál entre nasaun rua ne’e.
“Nu’udar Ministru Kultura Repúblika Indonézia, ha’u haksolok tebes hasoru malu fali ho Primeiru-Ministru, figura ida ne’ebé iha interese boot ba relasaun entre ita-nia nasaun rua- Timor-Leste no Indonézia. Objetivu hala’o vizita ida-ne’e atu hametin lasu kulturál entre nasaun rua,” Ministru Kultura Indonézia, Fadli Zon, hateten ba jornalista sira iha Palásiu Governu, ohin.
Antes ne’e, iha segunda (06 Outubru 2025), sira halo lansamentu ba Sentru Kulturál Indonézia iha Dili liuhusi atividade oioin, inklui diskusaun no workshop kona-ba filme, no ohin loron sei iha mós diskusaun iha Sala Leitura Xanana Gusmão kona-ba literatura, workshop kulinária no gastronómia no atividade kona-ba wastra (testíl tradisionál sira).
“Maibé, aspetu importante liu iha enkontru ne’e mak oinsá ita bele kolabora ho Ministru Kultura Timor-Leste hodi dezenvolve atividade konjunta sira liuliu ba jerasaun foinsa’e sira, hanesan rezidénsia kulturál sira, troka artista sira, workshop, halo filme hamutuk no programa kolaborativu sira seluk,” nia esplika.
Tuir planu, iha fulan-Novembru ne’e sira sei konvida mós Ministru Juventude Desportu Arte no Kultura Timor-Leste nian atu partisipa iha atendementu inisiativa ida husi Ministériu Kultura Indonézia nian, Sinérjia Kulturál Indonézia-Pasífiku, tanba ida ne’e hanesan plataforma foun ida hodi hametin kooperasaun kultura entre nasaun sira iha rejiaun Pasífiku.
Iha biban ne’e, Ministru Juventude Arte no Kultura, Nélyo Isaac Sarmento, hateten ohin Ministru kultura Indonézia hala’o enkontru ho PM hodi diskute kona-ba oinsá fortifika relasaun Timor-Leste ho Indonézia liuhusi Kultura.
“Ha’u informa ba ministru katak ami iha atividade anuál ne’ebé ita bolu festivál kultura iha fronteira, ne’ebé entre populasaun sira hela iha área fronteira ne’e, ne’e objetivu mak atu fortifika nasaun rua ne’e liuhusi atividade kulturál,” nia hateten.
Nia hatutan, Ministru Kultura Indonézia nian hetan responde di’ak husi ida-ne’e, no sira apresia hodi kontinua nafatin ida-ne’e ba oin liuhusi programa festivál fronteira.
Aleinde ne’e, nia hatutan, Ministru Kultura Indonezia ne’e mós atualiza sira-nia programa balun ne’ebé sei halo iha Nusa Tengara Timur (NTT) Indonezia no sira sei konvida mós Timor-Leste ba partisipa iha atividade hodi haree oinsá mak relasaun país sira-ne’e forte liután, la’ós de’it iha relasaun polítika maibé iha oportunidade ba TL atu hakbesik-an liuhusi kultura.
Jornalista : Alexandra da Costa
Editór : Cancio Ximenes
