Adérito introdús preparasaun adezaun TL ba ASEAN iha Vikeke
VIKEKE, 08 Outubru 2025 (TATOLI)—Vise-Ministru Asuntu Parlamentár, Adérito Hugo da Costa introdús kona-ba preparasaun Timor-Leste (TL) nian adezaun ba organizasaun The Association of Southeast Asian Nations (ASEAN) iha Outubru tinan ne’e.
“Durante ne’e ita esforsu hodi kompleta rekizitu sira ba adezaun nian ba komunidade ASEAN. Ita planeia dezde husi ita hetan independénsia. Prosesu lubuk ida mak ita ultrapasa hahú iha tinan 2011, foin hatudu sinál iha tinan kotuk, membru permanente husi organizasaun ASEAN nian fó lampu azúl,” Adérito Hugo da Costa hateten iha Suku Luka, Kuarta ne’e.
Notísia relevante: TL nia adezaun ba ASEAN atu konstitui objetivu estratéjiku nasionál
Governante ne’e esplika preparasaun Timor-Leste nian ba adezaun ASEAN, Parlamentu Nasionál ratifika ona dokumentu sira-ne’ebé durante ne’e Timor-Leste prepara ba ASEAN inklui rekizitu sira seluk.
“Ita ratifika ona tratadu no konvensaun barak ligadu ba adezaun ASEAN. Nune’e, iha 26 Outubru ne’e, sei deklara iha Kuala Lumpur, Malázia, hodi sai hanesan membru plena,” nia subliña.
Hugo esplika katak bainhira adere ba ASEAN, TL bele promove produtu husi rai-laran bá merkadu ASEAN nian, ho ida-ne’e sei eleva produtu sira iha nasaun ne’e.
Entretantu, iha aprezentasaun adezaun ASEAN ne’e hetan partisipasaun másima husi autoridade lokál, komunidade kompostu husi estudante no inan-aman sira.
Jornalista: Vitorino Lopez da Costa
Editór: Xisto Freitas da Piedade
