DILI, 08 Outubru 2025 (TATOLI)—Prezidente Institutu Nasionál Kombate HIV/SIDA (INCSIDA) Daniel Marçal, klarifika atu harii uma prostituisaun la’ós planu INCSIDA nian maibé hatutan de’it públiku nia preokupasaun.
Notísia Relevante: INCSIDA sei esforsu hodi ko’alia ho parte relevante atu harii uma prostituisaun
“Ho asuntu ne’ebé mak públiku parte balun kestiona iha midia katak, INCSIDA sei harii uma prostituisaun iha Timor-Leste, ha’u klarifika katak ida-ne’e la’ós planu INCSIDA nian maibé prekupasaun husi públiku nian, tanba ida-ne’e kondisaun ne’ebé mak presiza atu kria,” Daniel hateten ba jornalista sira edifisiu INCSIDA Praia dos Coqueiros, kuarta ne’e.
Nia dehan, daudaun ne’e públiku kestiona maka’as kona-ba transmisaun HIV ne’ebé sa’e aas tebes iha Timor-Leste tanba moras hada’et husi relasaun seksuál livre.
“Preokupasaun públiku ne’e ema hotu nian, katak HIV ne’e transmite barak liuhusi relasaun seksuál ida-ne’ebé livre, feto gosta ho mane rua-tolu-haat, no mane gosta ho feto tolu-haat no bele liu, husi ne’e mak moras ne’e bele hada’et lalais,” nia dehan.
Tuir Daniel, sé HIV transmite husi relasaun seksuál livre oinsá ema-nia hanoin kona-ba relasaun seksuál livre no meiu saida mak atu hamenus tanba laiha opsaun seluk, opsaun mak INCSIDA nafatin ko’alia hodi muda ema nia konsiensia.
Tanba ne’e, INCSIDA kontinua halo sensibilizasaun maibé servisu hamutuk ho mídia sira hotu atu transmite informasaun ne’ebé klaru oinsá hadook an husi relasau seksuál livre.
“INCSIDA sei halo esforsu nafatin atu ko’alia ho parte kompetente sira, liuliu parte relijiaun ne’ebé eziste iha Timor-Leste, hahú husi Igreja Katolika, Protestante, Hindu, Budista, no Musulmanu atu oinsa bele iha konseitu ida,” nia dehan.
Jornalista : Felicidade Ximenes
Editór : Cancio Ximenes
