VIKEKE, 08 Outubru 2025 (TATOLI)—Komunidade husi Suku Uabubu, Postu Ossú, Munisípiu Vikeke husu Ministériu Saúde (MS) konstrui postu saúde ida iha Suku Uabubu atu pesoál saúde sira uza ba atendimentu populasaun sira-ne’ebé moras.
“Ami tinan barak ona laiha postu saúde ida lokaliza iha ami-nia suku Uabubu hodi komunidade asesu ba tratamentu moras sira. Ida-ne’e ami sente preokupa tanba bainhira komunidade moras emerjénsia no partu ruma difikulta tebes, tanba laiha postu saúde. Baibain tenke lori bá Sentru Saúde Ossú ho distánsia ne’ebé dook foin hetan tratamentu,” abitante Suku Uabubu, Domingos Simões Monteiro hateten ba TATOLI iha Suku Uabubu, Kuarta ne’e.
Notísia relevante: https://tatoli.tl/2025/04/15/autoridade-uabubu-husu-governu-konstrui-postu-saude/
Nia haktuir daudaun ne’e pesoál saúde sira-ne’ebé destaka iha Uabubu uza provizória komunidade nia uma kuartu ida (1) hodi atende komunidade.
Iha fatin hanesan, pesoál saúde destakadu Suku Uabubu, Josefina da Costa Soares haktuir durante ne’e postu saúde ba suku referidu laiha nune’e xefe suku mak oferese ninia uma kuartu ida (1) ba pesoal saúde sira hodi uza konsulta moras iha tempu loron.
Kona-ba atendimentu, nia informa, kada loron atende ema na’in-20, dala ruma tun ba na’in-10, kondisaun uma mós kloot hodi difikulta atendimentu.
Hatán ba preokupasaun ne’e, Diretór Servisu Saúde Munisípiu Vikeke, Aljacsono S. Maia dehan kona-ba planu estratéjiku nasionál ba setór saúde nian hakarak kria kada suku sira hotu iha fasilidade postu saúde, maibé iha Suku Uabubu mak seidauk nune’e Servisu Saúde Munisípiu Vikeke aprezenta ona ba Ministériu Saúde hodi haree asuntu ida-ne’e.
“Preokupasaun komunidade Uabubu nian pertinente tebes. Ministériu Saúde kontinua esforsu rezolve suku sira-ne’ebé seidauk estabelese postu saúde,” nia relata.
Tuir dadus, Suku Uabubu ho totál populasaun 2.717 ho totál uma-kain 578 ne’ebé kompostu husi Aldeia Buanurak, Osogori, Lekibuti, Uailia no Letame.
Jornalista: Vitorino Lopez da Costa
Editór: Xisto Freitas da Piedade
